Rusiye politsiyası, martnıñ 20-nde kelgen Qırımnıñ İçki rayonındaki Savurçı köy camisini terk etti. Bu aqta «Qırım birdemligi» cemaat birleşmesi bildire.
Cuma namazını qıldırğan imamdan yazma malümat alındı ve davanıñ ketişatı aqqında haber etecegini vade etkenler.
«Qırım birdemligi» köy sakininiñ aytqanlarına esaslanıp bildirgenine köre, politsiya hadimleri «Vicdan ve diniy birleşmelerniñ serbestligi» Federal qanunından «Missionerlik faaliyetini keçirüv nizamına» dair 24.2 maddeni oqudı.
Rusiye uquq qoruyıcı organlarınıñ vekilleri vaziyetni şimdilik izaatlamadı. Rusiye quvetçileriniñ ziyaret sebepleri de belli degil. Qırım.Aqiqat, tafsilâtlı malümat almağa tırışa.
Qırımnıñ Rusiye prokuraturası aqmescitli imam Rasim Dervişevge qarşı memuriy dava açqan edi. Qararğa köre, o, cuma namazını qıldırıp ve vaaz etip qanunnı bozdı. Rusiye kontrolindeki Aqmescitniñ Mirovoy mahkemesi «qanunsız missionerlik faaliyeti» sebebinden Dervişevge 5 biñ ruble para cezasını berdi.
