Moskovada iyül 31-inde gece iyül 27-si aktsiyanıñ eñ azından eki iştirakçisiniñ evinde tintüv keçirildi, aktsiya iştirakçileri Moskova şeer duması saylavlarına mustaqil mabuslarnıñ iştirak etmek içün yiberilmesini talap ete edi.
"OVD-info" Rusiye portalınıñ malümatına köre, başta, özleriniñ tanıştırmasını red etken, politsiya hadimleri "Levıy blok" koordinatorı Vasiliy Küzminniñ ana-babasınıñ evine keldi. Faalni tahqiqat komitetine alıp kettiler, kvartiradan ise kompyuterni aldılar. Kuzminniñ sorğudan soñ yiberdiler, o, kütleviy çalqantılar davası boyunca şaat olaraq keçe, dep bildire Azatlıq Radiosı.
Bundan ğayrı, aktsiyanıñ başqa iştirakçisi Sergey Fominniñ ana-babasınıñ evi de tintilgeni aqqında malüm. Başta politsiya hadimleri onı evde tapmadı, keççe ise anası, eñ azından on adamnıñ iştiraginen tintüv başlandı, dep bildirdi. Fominni bilinmegen yerge alıp kettiler.
TASS rusiye haber agentliginiñ bildirgenine köre, tintüvlerni, FSB-niñ Anayasa tizimi qorçalavı ve terrorcılıq ile küreş hızmeti ve Rusiye İçki İşler Nazirliginiñ ekstremizm ile küreş merkezi keçire. Olar, iyül 27 aktsiyalarnıñ teşkilcileri ve koordinatorlarnı qıdıra, içtimaiy ağlarda ve messengerlerde yazılarnı ve yazışmalarnı teşkere, narazılıq iştirakçilerniñ alâqalarını bilmege tırışa.
İyül 27-sinde Moskova merkezinde izinsiz aktsiyada iştirak etkenlerniñ üzerinde keçirilgen mahkemelerniñ birinci kününde 40 tevqif qararı berildi. Eñ uzun apis müddeti "Navalnıy Live"nıñ alıpbarıcısı Vladimir Milovğa tayinlendi, oña 30 künlük apis cezasını berdiler.
İyül 27-sinde Moskovada Moskova şeer duması saylavlarına mustaqil mabuslarnıñ iştirak etmek içün yiberilmesini talap etken izinsiz aktsiya keçti. Uquq qoruyıcılarğa köre, aktsiyada politsiya ve Rosgvardiya 1373 adamnıtutıp aldı, olardan 200-den ziyadesi geceni politsiya bölüklerinde keçirdi. Narazılıq iştirakçilerniñ 70-den ziyadesi yaralandı.
