İyül 27-sinde Moskova merkezinde izinsiz aktsiyada iştirak etkenlerniñ üzerinde keçirilgen mahkemelerniñ birinci kününde 40 tevqif qararı berildi. Eñ uzun apis müddeti "Navalnıy Live"nıñ alıpbarıcısı Vladimir Milovğa tayinlendi, oña 30 künlük apis cezasını berdiler, dep bildire Azatlıq Radiosı.
On beş künge Qabarcılıq ile küreş Fondunıñ müdiri İvan Jdanovnı da daa üç adamnı tevqif ettiler. Qalğanları üçten on üç künge qadar tutuldı, dep bildire "OVD-İnfo" Rusiye uquq qoruyıcı portalı.
Apis etilgenlerniñ arasında - qayd etilmege namzetler İlya Yaşin ve Konstantin Yankauskas. Olar, sıranen, 10 ve 7 künlük apis müddetini aldı.
İyül 30-ında saba bilingenge köre, Moskova mahkemeleri 79 adamğa umumen bir million rubleden çoq para cezasını ödetti. Eñ azından üç davada mahkeme, büyük cezalarnı tayinledi - 150 biñ ruble. Hususan, bu qadar aqça Pussy Riot iştirakçisi Mariya Alöhinadan alındı.
Moskova şeer mahkemesi, cumaertesi künü keçirilgen aktsiyadan soñ, memuriy qanun bozmaları aqqında paytaht mahkemelerine eki yüzden çoq protokol berildi, dep bildire.
Tutulğanlarnıñ birisi, Rosgvardiya hadimine qarşı zorbalıqnen areket etkeninen qabaatlana. Tahqiqatqa köre Yevgeniy Kovalenko, OMON hadimine çöplüklikni attı. O qabaatını qabul etti ve sentâbrniñ 27-sine qadar apis etildi.
İyül 27-sinde Moskovada Moskova şeer duması saylavlarına mustaqil mabuslarnıñ iştirak etmek içün yiberilmesini talap etken izinsiz aktsiya keçti. Uquq qoruyıcılarğa köre, aktsiyada politsiya ve Rosgvardiya 1373 adamnıtutıp aldı, olardan 200-den ziyadesi geceni politsiya bölüklerinde keçirdi. Narazılıq iştirakçilerniñ 70-den ziyadesi yaralandı.
