Rusiye politsiya hadimleri dekabrniñ 25-nde Moskvadan qaytqan qırımtatarlarnı Keriç köpründe toqtattı. Olar «Hizb ut-Tahrir davası» (Aqmescitteki birinci gruppa) mabüsleriniñ ükmüne qarşı berilgen istinaf şikâyetini baqqan Rusiye Yuqarı mahkemesiniñ oturışuvına bardı. Bu aqta «Qırım birdemligi» cemaat birleşmesi Facebookta haber etti.
«Tutulğanlar şahsiy avtobusnen kete edi. Qırımğa kirgende Keriç köpründe saat 22:05-te naqliyatnı politsiya hadimleri toqtattı. Olar avtobusta olğanlarnıñ vesiqalarını teşkerdi. Beşiniñ pasportı qaytarılmadı. Olardan sorğuğa keçmeleri rica ettiler. Terror faaliyetine alâqaları barmı ve angi islâmni kütkenlerini soradılar», – dep tarif etti faaller.
Haberde politsiya sorğuğa çekken qırımlılarnıñ cedveli berildi: Selâmetov Sabri Remziyeviç, Hoşçu Osman Mustafayeviç, Kulametov Zekiy Vaitoviç, Kürkçi Rustem, Mustafayev Seydamet Enveroviç.
Rusiye politsiyasınıñ vekilleri resmiy izaat bermey. Diger menbalar da bu malümatnı tasdıqlamay. Qırım.Aqiqat tafsilâtlı malümat almağa tırışa.
Rusiye Yuqarı mahkemesi dekabrniñ 24-nde istinaf şikâyetini baqıp, «Hizb ut-Tahrir davası» mabüsleriniñ (Aqmescitteki birinci gruppa) ükmüni deñiştirdi. Qırımlılarnıñ apis cezaları 6 ayğa eksildi.
Böylece, Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov 11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
2019 senesi iyün ayında Rostov-na-Donunıñ Cenübiy okrugınıñ arbiy mahkemesi bu dava mabüsleri Teymur Abdullayevni 17 yılğa, Uzeir Abdullayevni 13 yılğa, Rustem İsmailovnı 14 yılğa, Ayder Saledinov ve Emil Cemadenovnı 12 yılğa üküm etti.
Ukraina Tış işler nazirligi bu davağa narazılıq bildirip, Rusiyege qarşı sanktsiyalarnı quvetleştirmege çağırğan edi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
