Aqmescitte Rusiye quvetçileri noyabrniñ 1-nde gece Futbolistov soqağında Merkeziy rayon polis bölügi yanında toplaşmağa yasaqladı, anda mahkeme binası ögünde tutulğan qırımtatar faalleriniñ tuvğanları ve yaqınları keldi.
«Qırım birdemliginiñ» mühbiri adise yerinden canlı yayın yaptı. Anda quvetçilerniñ Qırımda «kütleviy toplaşuvlarnıñ keçirilmesi yasaq olğanına» esaslanıp, toplaşqanlardan dağılmalarını talap etkeni körüne.
Aqmescitte noyabrniñ 1-nde Rusiye kontrolindeki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» toplaşuvına diñleyici olaraq kelgen insanlarnı tuttı. Umumen 19 kişi tutuldı. Daa soñra advokatlar olarnı rayon bölüginden yiberdiler, polis «fevqulâde vaziyetniñ peyda oluv telükesi bar olğanda areket qaidelerine riayet etmegenleri» içün 18 memuriy protokol tizdi, dep bildirdi.
Qırım Muhtar Cumhuriyeti ve Aqyar prokuraturası noyabrniñ 1-nde faallerniñ tutulmasınen bağlı cinaiy tahqiqat başlattı. Ukraina Tış işler nazirligi dünyanı Aqmescitte qırımtatar faalleri kene tutulğanı içün Rusiyege qarşı basqı yapmağa devam etmesine çağırdı.
