Rusiye «Ukrainağa qarşı yayğaranı arttırmaq içün» öz toprağında terakt yapa bile, dep tahmin ete Ukraina Mudafaa nazirligi Baş istihbarat idaresi aprelniñ 12-nde.
Bu aqta Baş istihbarat idaresi müessise yolbaşçısı Kirill Budanovğa esaslanıp bildirdi.
«Rusiye mahsus hızmetleri Rusiye meskün yerlerinde mesken ev, hastahane ve mekteplerge mayın qoyuv ve patlatuvnı planlaştıra. Ve Belgorod ya da (işğal etilgen – QA) Qırımnıñ şeerlerinden birine raketa-bomba darbelerini endirmege planlaştıra», – dep bildirdi Budanov.
Onıñ fikirince, Rusiye Federatsiyasınıñ akimiyeti «Rusiyede seferberlik planı muvafaqiyetli olamağanı içün» Rusiye cemiyetini duyğulandırmağa ve birleştirmege istey.
«Bunıñ içün Rusiye meskün evlerinde patlavlar ya da raketa darbeleri planlaştırıla, Ukraina Silâlı quvetleri ve göñülli batalyonlar qabaatlanacaq, «Ukraina milletçileriniñ canavarlığı» duyğulı resmini yapacaq olalar», – dep bildire Baş istihbarat idaresi yolbaşçısınıñ aytqanlarını matbuat hızmeti.
Ukraina istihbaratı yolbaşçısınıñ fikirince, Rusiyeniñ Belgorod ve Kursk vilâyetlerinde «okoplar qazıla, uydurılğan Ukraina göñülli batalyonları ve diversion gruppalarnıñ ücüminen bağlı panika köterile», dep qoştı Budanov.
«Putinniñ idare etüvi Rusiye çoq daireli evlerine qarşı KGB teraktlarından başladı, Çeçenistannı yoq etmek içün sebep oldı. Şimdi, ğaliba, aynı usullarnen bitecek», – dep izaatlay Baş istihbarat idaresi.
Aprelniñ 5-nde Ukraina telükesizlik hızmeti Rusiye Ukrainanı qabaatlamaq içün Mariupolde büyük provokatsiya azırlay, dep bildirdi. Onıñ malümatına köre, rusiyeliler öldürgen Mariupol sakinleriniñ cesedlerini bir yerde toplap, Ukraina ordusınıñ qurbanları kibi köstermege isteyler.
Aprelniñ 11-nde Qırımda terror telükesiniñ yüksek («sarı») seviyesi ilân etildi.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
