İşğal etilgen Qırımda quvetçiler Rusiye ordusına seferberlik çerçivesinde qırımtatarlarğa eñ az 1500 celpname berdi. Bunı Ukrayina prezidentiniñ Qırım MC-deki daimiy temsilcisi Tamila Taşeva bildirdi.
"Malüm olğanı kibi, qırımtatarlarğa eñ az 1500 celpname berdiler. Bu celpnameler qırımtatarlarnıñ toplu yaşağan yerlerde berildi. Misal olaraq, Bağçasaraynıñ 6 ve 7-nci mikrorayonlarında, Aqmecit civarında Stroganovkada, Zuyada, Saq şeerinde, Qalay, Mayskoye qasabalarında", - dedi o.
Taşeva Qırımda seferber etilgenlerniñ sayısı aqqında şimdilik malümat olmağanını bildirdi . Aynı zamanda, Taşeva qayd etti ki, Rusiye memuriyetiniñ Qırımnıñ 3-3,5 biñ sakinini cenkke yollamağa planlaştırğanına köre, o zaman 1500 celpnamen ve atta biñ seferber etilgen qırımtatar "büyük bir qısımdır".
Sentâbrniñ 21-nde Rusiyede ilân etilgen qısmiy seferberlik sebebinden Qırım ve Aqyarnıñ Rusiye akimiyeti askerlikke aluv komissiyalarını quruv aqqında bildirdi. Sergey Aksenov esas Ukrayınağa 1200 «göñüllini» yolladı ve daa eki batalyon azırlay, dep bildirdi.
Qırımdaki Rusiye kütleviy haber vastaları «añlaşmalı arbiy hızmetniñ» reklamasını yapa.
İşğal etilgen Qırımnıñ tahminen 5000 sakini Rusiye prezidenti ilân etken qısmiy seferberlikten soñ arbiy komissarlıqqa celpname aldı.
Daa evel berilgen malümatqa köre, Qırım ve Aqyarda Rusiyeniñ Ukrayınağa qarşı cenkinde ölgen Rusiye arbiylerini defin etmege devam eteler.
Ukrayına prokuraturasınıñ malümatına köre, 2015 senesinden başlap Rusiye Qırımda Rusiye Federatsiyasınıñ silâlı quvetlerine askerlikke aluv qanunsız kampaniyasını 15 kere keçirdi. Aq qorçalayıcılar Qırım ve Aqyar sakinleriniñ Rusiye ordusına aluvını halqara uquq bozuluvı dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
