Moskova meriyası, öldürilgen Rusiye muhalefet siyasetçisi Boris Nemtsovnıñ hatırasına bağışlanğan yürüşni tasdıqlaycağını haber etti, aktsiya fevralniñ 29-ında keçirilecek. Bunı Azatlıq Radiosınıñ rus hızmeti haber ete.
Faaller qayd eteler ki, yürüş sadece öldürilgen mehalefet siyasetçiniñ hatırasını añmaq içün degil, Rusiye Anayasasına kirsetilgen deñişmelerge de munasebetni bildirmek bir fırsat berecek.
Rusiyeniñ Sankt-Peterburg şeeriniñ Qanun ve qanunlıq komiteti daa evel Boris Nemtsovnıñ hatırasına bağışlanğan şeer merkezinde yürüşqa razılıq bermedi.
Boris Nemtsov 2015 senesi fevralniñ 27-nde Kremlge yaqın Büyük Moskvoretskiy köpüri üzerinde atıp öldürilgen edi. Onıñ öldürilüvinen alâqalı üküm bıltır iyül ayında çıqarılğan edi. Siyasetçiniñ öldürilüvinde qabaatlanğanlar 11 ile 20 yıllıq apis cezasına mahküm etildi. Cinayetni yaptırğan şahıs ale daa tapılmadı.
Nemtsovnıñ öldürilüvi bütün dünyanı çorlap, halqara cemaatçılıqnıñ rusiyeli muhlefetçilerniñ ağır alına celp etken edi.
Keçken yıl Moskvada rusiyeli muhalefetçi Boris Nemtsovnıñ hatırasına bağışlanğan yürüş iştirakçilerini toplanğan yerlerinde politsiya hadimleri teşkerdi. Küç idaresiniñ hadimleri faallerden «Putin, yalan aytqanıñ ve cenkleşkeniñ yeter», «Men Qırım ilhaqına qarşım» yazılı plakatlarını çekip aldılar. Miting iştirakçileriniñ sayğan «Belıy sçötçik» (beyaz sayğıç) leyhasınıñ göñüllileri bergen malümatqa binaen, Moskvada Boris Nemtsovnıñ hatırasına bağışlanğan aktsiyada yedi biñden ziyade insan iştirak etken. Rusiyeli muhalefetçiniñ hatırasına bağışlanğan mitingler aynı zamanda Rusiyeniñ diger şeerlerinde de keçti. Novosibirskte eki yüzge yaqın, Qazanda – yüzge yaqın insan iştirak etken, ayrıca aktsiyalar Ufa ve İjevskte de ötkerilgen.
