Moskvada rusiyeli muhalefetçi Boris Nemtsovnıñ hatırasına bağışlanğan yürüş iştirakçilerini toplanğan yerlerinde politsiya hadimleri teşkere. Küç idaresiniñ hadimleri faallerden «Putin, yalan aytqanıñ ve cenkleşkeniñ yeter»,«Men Qırım ilhaqına qarşım» yazılı plakatlarını çekip aldılar, dep haber ete Azatlıq Radiosınıñ Rusiyedeki temsilciligi.
«OVD-İnfo» neşiri haber etkenine köre, politsiya eñ az üç kişini tutıp alğan.
Miting iştirakçileriniñ sayğan «Belıy sçötçik» (beyaz sayğıç) leyhasınıñ göñüllileri bergen malümatqa binaen, Moskvada Boris Nemtsovnıñ hatırasına bağışlanğan aktsiyada yedi biñden ziyade insan iştirak etken.
Yürüş teşkilâtçıları tedbirde 30 biñge yaqın insan iştirak eter dep beklegenler.
Rusiyeli muhalefetçiniñ hatırasına bağışlanğan mitingler aynı zamanda Rusiyeniñ diger şeerlerinde de keçti. Novosibirskte eki yüzge yaqın, Qazanda – yüzge yaqın insan iştirak etken, ayrıca aktsiyalar Ufa ve İjevskte de ötkerilgen.
Fevralniñ 27-nde – Rusiye ükümetiniñ sabıq vitse-premyeri, soñradan muhalif siyasetçi Boris Nemtsovnıñ öldürilgenine üç yıl tola.
Boris Nemtsov 2015 senesi fevralniñ 27-nde Kremlge yaqın Büyük Moskvoretskiy köpüri üzerinde atıp öldürilgen edi. Onıñ öldürilüvinen alâqalı üküm bıltır iyül ayında çıqarılğan edi. Siyasetçiniñ öldürilüvinde qabaatlanğanlar 11 ile 20 yıllıq apis cezasına mahküm etildi. Cinayetni yaptırğan şahıs ale daa tapılmadı.
Nemtsovnıñ öldürilüvi bütün dünyanı çorlap, halqara cemaatçılıqnıñ rusiyeli muhlefetçilerniñ ağır alına celp etken edi.
