Rusiye Federatsiyası ekinci Aqyar "Hizb ut-Tahrir" gruppası davası boyunca mahküm etilgen Qırımtatar Rustem Tairovnı resmiy şekilde vatandaşlığından marum etti. Bunı Qırımtatar resurs merkeziniñ idarecisi Zarema Bariyeva bildirdi.
"55 yaşındaki Rustem Tairovnıñ vatandaşlığından 2025 senesi quralayda, Rusiye Federatsiyasınıñ Vladimir şeerindeki 2-nci apishanesinde bulunğan vaqıtta, tam olaraq eki yıl keçken soñ, 2023 senesi quralayda Cenübiy okrugınıñ arbiy mahkemesi tarafından qanunsız sürette mahküm etilgen soñ lâğu etildi", — dep qayd etti o.
Bariyevanıñ aytqanına köre, Rustem Tairov 4 yıldan ziyade apishanede onıñ dört "cinayetdeşi" Rustem Murasov, Cebbar Bekirov, Zavur Abdullayev ve Raif Fevziyev ile beraber buluna, olarnı 2021 senesi arman ayınıñ 17-nde Qırımnıñ bir çoq şeerinde keçirilgen tintüvlerden soñ qanunsız sürette apiske alğan ediler.
O, şunı da hatırlattı ki, yaqın vaqıtta Rustem Tairov 56 yaşını özü içün yañı olğan yerde qayd etecek – Udmurtiya Cumhuriyetiniñ Hohrâki köyündeki 8-nci TC-de. Apiske alınğanmazdan evel Rustem aşçı yardımcısı olıp çalıştı ve Aqyarda yaşadı.
