Yanvarniñ 26-nda Aqmescitte Rusiye mahkemesi binası ögünde yaqalanğan qırımtatar faalleri mahkeme etildi. Bunı "Qırım birdemligi" cemaat birleşmesi haber etti.
Uquq qoruyıcılarnıñ haber etkeni kibi, Rusiye quvetçileri 33 kişini yaqaladı. Ruslan Ümerovdan ğayrı er keske mahkemeci tarafından memuriy tevqif berildi.
Ümerovğa 20 biñ ruble para cezası berildi. "Qırım birdemligi"niñ bildirgenine köre, erkek ekinci gruppa saqatıdır.
Memuriy davalar Aqmescitniñ Kiyev, Merkeziy ve Demiryol mahkemelerinde baqıldı.
"Yaqalanğanlarnı Aqmescitniñ muvaqqat tutuv izolâtorına alıp kettiler. Anda olar "cezalarını" çekecekler", - dep yazıla bilidrmede.
Yanvarniñ 25-nde Rusiye Federatsiyasınıñ kontroli altındaki Aqmescitniñ Kiyev rayon mahkemesiniñ binası ögünde Rusiye quvetçileri 34 kişini yaqaladı. Berilgen malümatqa köre, yanvarniñ 25-nde saba faaller Aqmescitniñ Kiyev rayon mahkemesi ögünde toplaşıp, yanvarniñ 24-nde Rusiye akimiyeti tarafından «terrorizmde» ve «Ukrayına ile bağları» olğanında şübheli sayılıp tutulğan altı qırımtatarгъа qoltutmağa istedi. Soñra Rusiye mahkemesiniñ binasına Rosgvardiya maşinası, eki qoyulaştırılğan avtobus, Rusiye polisi keldi, faaller kütleviy şekilde tutuldı.
Yanvarniñ 25-nde Rusiye kontrolindeki Aqmescitniñ Kiyev rayon mahkemesi Ekrem Kroş, Ayder Asanov, Refat Seydametov, Osman Abdurazakov, Leman Zekiryayev ve Halil Mambetovnı 2023 senesi martnıñ 24-ne qadar apiske aldı.
Yanvarniñ 24-nde saba işğal etilgen Qırımnıñ Canköy şeeri ve rayonında Rusiye quvetçileri qırımtatarlarnıñ evlerinde tintüv keçirdi: Nemse Canköy köyünde (Blijnegorodskoye) Ekrem Kroşnıñ, Timofeyevka köyünde Ayder Asanov ve Refat Seydametovnıñ, Çoqraqlı Şeyh Eli (Dneprovka) Osman Abdurazakovnıñ, Canköyde Löman Zekiryayev ve Halil Mambetovnıñ evlerinde.
Ekrem Kroşnıñ ömür arqadaşı Amideniñ «Qırım birdemligi» cemaat birleşmesine bildirgenine köre, Qırımnıñ şimalinde tutulğan qırımtatarlar «terrorizmde» qabaatlana bile. Mustaqil advokatlarğa qırımlı musulmanlarnıñ yanına keçmege izin berilmedi.
Daa soñra belli olğanına köre, yanvarniñ 24-nde saba Canköyde ve Canköy rayonında tutulğanlar terror teşkilâtını teşkil etüv ve faaliyetinde iştirak etüv ile qabaatlanalar (RF Ceza qanunnamesiniñ 205,5 maddesi – QA). Laf Rusiyede yasaqlanğan «Hizb ut-Tahrir» teşkilâtı aqqında kete.
Qırımnıñ işğal yolbaşçısı Sergey Aksönov qırımtatarlarnıñ evlerinde keçirilgen tintüvlerni izaatlap, quvetçiler «Ukrayına ile alâqalarda» qabaatlanğan altı kişini yaqalağanını bildirdi.
Ukrayına prezidentiniñ Qırım Muhtar Cumhuriyetindeki daimiy temsilciligi Qırımnıñ şimalinde Ukrayına vatandaşlarınıñ tutuluvını takbih etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
