Kaluga (Rusiye) şeeriniñ Merkeziy bölgesiniñ akemlik makemesi, "Taygan" arslanlar parkınıñ reklama yazısınıñ yıqması aqqında keçken mahkeme qararını tasdıqladı. Bunı yanvar 20-sinde Qırım.Aqiqatqa parknıñ saibi, Qırım iş adamı Oleg Zubkov haber etti.
"Yanvarniñ 16-sında Yigirmi birinci akemlik apellâtsiya makemesiniñ qararını amelde qaldırdılar. Böyle olacağı belli edi. Biz yıqmaycaqmız. Askönov bunı büdjet parasına yapıp, bütün memleketke masqara olmağa mecbur olur. Men, özgün olğan şeyni iç bir vaqıt yıqmam", - dedi Zubkov.
İş adamınıñ aytqanına köre, o, sadece mahkeme qararına binaen yıqmaqqa para berir.
Daa evel bir aynıñ içinde Qarasuvbazardaki "Taygan" arslanlar parkınıñ zararları 10 million rubleden çoq oldı, dep parknıñ saibi, Qırım iş adamı Oleg Zubkov bildirgen edi.
Daa evel Rusiye nezaretindeki Qarasuvbazar (Belogorsk) rayon mahkemesi dekabrniñ 23-ünde "Taygan" parkını daa bir ayğa qapatmaq qararını aldı.
Noyabrniñ 14-nde Zubkov, mahkeme park işini toqtatsa, 30 ayuvnı öldürmege mecbur olacaq, dep bildirdi. Qırımnıñ rusiyeli Tabiat Nazirligi, Zubkovnıñ ayuvlarnıñ ihtimallı "atuvı ya da evtanaziyası" aqqında aytqanı içün, qanun bozmasında saqındırdı.
Kreml kontrolindeki Yalta mahkemesi noyabrniñ 21-nde Oleg Zubkovdan ayvanlarnı musadere etüv davasını baqmağa başladı.
2014 senesi Rusiyeniñ yarımada ilhaqına qoltutqan qırımlı iş adamı Oleg Zubkovnıñ Qırımnıñ Rusiye akimiyetinen zıddiyeti bar. Oleg Zubkov, mal-mülki bulunğan topraq damartılarınıñ vesiqalarını beş yıldan berli resmiyleştirip olamay, dep bildire.
Qırım işğali devamında Zubkov Kreml kontrolindeki Qırım akimiyeti tarafından oña nisbeten para cezaları ve qabaatlavlarnen bağlı tahminen 500 mahkeme oturışuvına bardı.
