Bir aynıñ içinde Qarasuvbazardaki "Taygan" arslanlar parkınıñ zararları 10 million rubleden çoq oldı, dep bildirdi Qırım.Aqiqat muhbirine parknıñ saibi, Qırım iş adamı Oleg Zubkov.
Onıñ aytqanına köre, Qırımda şimdi sıcaq ava, bu turistlerniñ kelmesine sebep olacaq edi.
"Bir aynıñ içinde "Taygan" arslanlar parkınıñ qapalğanından zararlar 10-12 million rublege çıqtı. Bu, parkqa kiris biletleriniñ satılmasından kelmege aqçalardır", - aytıp berdi iş adamı.
Bundan ğayrı o, yetişmegen paralarnıñ qaytaracaqlarında şübelene ve parknıñ bankrotlığı "onıñ reyder zapt etilmesi planınıñ bir qısmıdır", dep qayd etti.
Daa evel Rusiye nezaretindeki Qarasuvbazar (Belogorsk) rayon mahkemesi dekabrniñ 23-ünde "Taygan" parkını daa bir ayğa qapatmaq qararını aldı.
Noyabrniñ 14-nde Zubkov, mahkeme park işini toqtatsa, 30 ayuvnı öldürmege mecbur olacaq, dep bildirdi. Qırımnıñ rusiyeli Tabiat Nazirligi, Zubkovnıñ ayuvlarnıñ ihtimallı "atuvı ya da evtanaziyası" aqqında aytqanı içün, qanun bozmasında saqındırdı.
Kreml kontrolindeki Yalta mahkemesi noyabrniñ 21-nde Oleg Zubkovdan ayvanlarnı musadere etüv davasını baqmağa başladı.
2014 senesi Rusiyeniñ yarımada ilhaqına qoltutqan qırımlı iş adamı Oleg Zubkovnıñ Qırımnıñ Rusiye akimiyetinen zıddiyeti bar. Oleg Zubkov, mal-mülki bulunğan topraq damartılarınıñ vesiqalarını beş yıldan berli resmiyleştirip olamay, dep bildire.
Qırım işğali devamında Zubkov Kreml kontrolindeki Qırım akimiyeti tarafından oña nisbeten para cezaları ve qabaatlavlarnen bağlı tahminen 500 mahkeme oturışuvına bardı.
