Krasnodardaki Rusiye mahkemesi İslâm Terek rayonınıñ sakini Dilâver Gafarovnıñ qabaatlav ükmüni 2 ayğa qısqartıp, onı yımşaqlaştırdı. Bunı "Qırım birdemligi"ne Dilâver Gafarovnıñ qadını bildirdi. Onı «Ukrainanıñ qanunsız silâlı birleşmesinde» iştirak etkeninde qabaatlanğan ediler.
"O Stavropol vilâyetiniñ Koçubeyevskoye köyündeki İK-1-den resmiy telefon çağırışnı yaptı ve mahkeme oturışınıñ neticelerini haber etti", - dedi Dilâra Gafarova.
İmayeciler Arman Petrosân ve Aleksandr Muzıkanıñ şikâyetlerini 2020 senesi iyün 17-sinde diñleyiciler ve soylarsız keçken mahkeme oturışında baqtılar.
Kreml kontrolindeki Qırımnıñ İslâm Terek rayon mahkemesi avgustnıñ 28-nde «Ukrainanıñ qanunsız silâlı birleşmesinde» iştirak etkeninde qabaatlanğan Dilâver Gafarovnıñ ükmüni çıqardı. Er adam 10 yıl sert rejimli koloniyada qalmasına ve bir yıl azatlığınıñ sıñırlanmasına üküm etildi. Prokuror ise 12 yılğa azatlıqtan marum etilmesini istedi.
2018 senesi oktâbrniñ 30-nda saba İslâm Terek rayonınıñ Jemçujina Krıma köyünde Rusiye quvetçileri yerli sakin, tükân satıcısı Dilâver Gafarovnıñ evini tintken edi.
2018 senesi noyabrniñ 1-nde Rusiye FSBsi bildirdi ki, Qırımda İslâm Terek rayonınıñ sakini «Ukrainada qanunsız silâlı birleşmelerde» iştirak etkeninde qabaatlanıp yaqalandı. Laf İslâm Terek rayonındaki Jemçujina Krıma köyüniñ sakini, tükân satıcısı Dilâver Gafarov aqqında kete edi. Daa soñra onı apiske aldılar. Ukraina Tış işler nazirligi bunı takbih etip, Rusiyeniñ yapqanlarına qarşı narazılıq bildirdi.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Qırımtatar Milliy Meclisi, bu meselenen bağlı bütün malümat Ukraina prezidenti Petro Poroşenko ve İç işler naziri Arsen Avakovğa berildi, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege çağırğan edi.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
