Kreml kontrolindeki Qırımnıñ İslâm Terek rayon mahkemesi avgustnıñ 28-nde «Ukrainanıñ qanunsız silâlı birleşmesinde» iştirak etkeninde qabaatlanğan Dilâver Gafarovnıñ ükmüni çıqardı. Er adam 10 yıl sert rejimli koloniyada qalmasına ve bir yıl azatlığınıñ sıñırlanmasına üküm etildi.
Bu aqta qırımlı faal Mihail Batrak Qırım.Aqiqatqa bildirdi.
«Tünevin prokuror 12 yılğa azatlıqtan marum etilmesini istedi. Qabaatı tolusınen isbatlandı, dep ayttı. Asılında qabaatı isbatlanmağan edi. Gizli şaat bar edi, onıñ aytqanlarını isbatlamaq imkânsız ola. Daa bir delil: Noman Çelebicihan batalyonınıñ bayrağı. Bunıñ kibi dava boyunca qabaatlanğan daa eki kişi malümat berdi. Amma olar qabaatını tanıp, tahqiqatnen işbirligine razı oldı», – dedi Batrak.
Onıñ aytqanına köre, imaye tarafı ükümni şikâyet etmege niyetlene, Gafarovnıñ özü ise qabaatını tanımay ve «Noman Çelebicihan batalyonında iştirak etmegenini» bildire.
Üküm çıqarılğanına dair malümatnı ukrainalı uquq qoruyıcılar da tasdıqlay.
Qırım.Aqiqat «Asker» cemaat teşkilâtınıñ yolbaşçısı Lenur İslâmovnen bağlanmağa tırıştı, amma haber derc etilgende izaat alıp olamadı.
2018 senesi oktâbrniñ 30-nda saba İslâm Terek rayonınıñ Jemçujina Krıma köyünde Rusiye quvetçileri yerli sakin, tükân satıcısı Dilâver Gafarovnıñ evini tintken edi.
2018 senesi noyabrniñ 1-nde Rusiye FSBsi bildirdi ki, Qırımda İslâm Terek rayonınıñ sakini «Ukrainada qanunsız silâlı birleşmelerde» iştirak etkeninde qabaatlanıp yaqalandı. Laf İslâm Terek rayonındaki Jemçujina Krıma köyüniñ sakini, tükân satıcısı Dilâver Gafarov aqqında kete edi. Daa soñra onı apiske aldılar. Ukraina Tış işler nazirligi bunı takbih etip, Rusiyeniñ yapqanlarına qarşı narazılıq bildirdi.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Qırımtatar Milliy Meclisi, bu meselenen bağlı bütün malümat Ukraina prezidenti Petro Poroşenko ve İç işler naziri Arsen Avakovğa berildi, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege çağırğan edi.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
