Rusiyeniñ Vladikavkaz şeeriniñ Sovet rayon mahkemesi qırımtatar Leniye Umerovanı "polis hadimlerine boysunmamazlıq" qabaatı ile bir daa qabaatlı tanıp, 15 künge tevqif etti. Bunı"Qırım uquq qoruyıcı gruppası" haber ete.
Mahkeme qararına köre, aperelniñ 26-nda qız polis hadimleriniñ talaplarına baqmadan mahsus arabadan çıqmaqtan red etken. Umerovağa qarşı RF Memuriy uquq bozma Qanunnamesiniñ 19.3 maddesiniñ 1-nci qısmına binaen (polis hadimlerine boysunmamazlıq) kene protokol tizgenler.
Uquq qoruyıcılar, Umerova ve onıñ advokatı bosunmamazlıq kibi bir şey olmağanını mahkemege añlatqanlarını qayd eteler.
2022 senesi dekabrniñ 4-nde 25 yaşında Leniye Umerova Kıyivden Qırımğa barmağa tırışqanda Rusiye quvetçileri tarafından yaqalandı. Rusiye sıñırcıları Leniye Umerovanı Gürcistan-Rusiye sıñırından keçken soñ rejim alanı qaidelerini bozğanı sebebinden tuttı. Martnıñ 16-na qadar Leniye Vladikavkaz yaqınlarında Çetel vatandaşlarını vaqtınca tutuv merkezinde tutuldı. Rayon mahkemesi qıznı «devlet sıñırı rejimini bozğanında» (Rusiye Federatsiyasınıñ Memuriy uquq bozuvları kodeksiniñ 18-inci maddesiniñ 1-inci qısmı) qabaatlap, 2 biñ ruble para cezasını berdi. Martnıñ 16-nda gece Leniye Umerova çetel vatandaşlarını tutuv merkezinden çıqarıldı.
Leniyeniñ ağası Aziz Umerov Qırım.Aqiqatqa izaat berip, qız qardaşı üç ay devamında çetel vatandaşları içün merkezde tutuldı, dep tarif etti. Amma martnıñ 13-nde mahkeme qararınen onı azat ettiler.
«Advokatlarğa, tuvğanlarına telefon etmege imkân bermediler – gece yarısı onı o merkezden çıqardılar. Bundan soñ vatandaş urbada erkeklernen maşina keldi, başına çuval taqqanlar, belli olmağan yerge alıp ketkenler ve soqaqqa atqanlar», – dep tarif etti Umerov.
Aman-aman birden Leniyeni vesiqaları olmağanı içün polis patruli tuttı, dep tarif etti ağası. Rusiye mahkemesi ise onı 15 künge apiske aldı. Soñra qızğa qarşı daa eki protokol tizildi – ana-babasına telefon etmek içün qullanğan telefonını vaqtında bermegeni ve konvoy maşinasından çıqmağa razı olmağanı içün. Eki sefer de mahkeme Ukrayina vatandaşınıñ apis müddetini 15 künge uzattırdı.
Qırım Muhtar Cumhuriyeti ve Aqyar prokuraturası Rusiye tarafından qırımtatarı Leniye Umerovanıñ tutulğanını tahqiq etip olamay, çünki bu cinayet Qırımda olmağan.
Aq qorçalayıcılarnıñ malümatına köre, Ukrayinağa qarşı tam istilâ başlağan soñ işğal etilgen topraqlarda Rusiye uquq qoruyıcıları Ukrayina vatanperverleri, göñülli, cemaat faalleri, jurnalist, ATO/OOS veteranlarını daa sıq hırsızlap başladı. Çoqusı işğal etilgen Qırımğa çıqarılıp, SİZOğa qapatıla.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
