Qomşu Rusiyeniñ Cenübiy okrugınıñ arbiy mahkemesi Ukraina tarafdarı faali, qırımlı Oleg Prıhodkonıñ apis müddetini üç ayğa uzatıp, onı 2021 senesi martnıñ 16-na qadar apiste qaldırdı. Bu aqta advokat Nazim Şeyhmambetov «Qırım birdemligine» bildirdi.
Qayd etilgenine köre, qabaatlayıcı taraf mabüsni eski sebeplerden SİZOda qaldırmağa rica etti. İmaye, Oleg Prıhodkonıñ sağlığı zayıf ve mahkeme tahqiqatı yekünlenmek üzere olğanı içün şaatlarğa tesir etmege ya da delillerge zarar ketirmege imkânı yoq dep, sıñırlav müddeti apiste tutulmasınen olmamasını rica etti.
Rusiye FSBsi, Rusiye quvetçileriniñ qırımlı faal Oleg Prıhodkonıñ evinde keçirilgen tintüv vaqtında tapılğan sim-kart olmağan bir şahıs adına qayd etilgenini ögrendi.
Oleg Prıhodkonıñ qızı Natalya Şvetsova Rusiyeniñ Rostov-na-Donu SİZOsında tutulğan babasınıñ sağlıq vaziyeti fenalaştı, dep bildirgen edi.
2020 senesi yanvarniñ 16-nda berilgen malümatqa köre, Prıhodkonıñ yañı qabaatı aydınlatıldı – «patlayıcı madde ya da patlayıcı cihaznı qanunsız aluv, berüv, satuv, saqlav ya da taşuv». Prıhodko Lvivdeki Rusiye baş konsullıq binasını patlatmağa tırışqanında da qabaatlana.
Oleg Prıhodko 2019 senesi oktâbrniñ 10-nda tutuldı. Rusiye FSBsi onı terror ücümini azırlağanında ve patlayıcı maddelerni qanunsız yapqanında qabaatladı.
Qırım Muhtar Cumhuriyetiniñ prokuraturası Qırımda faalniñ apiske alınğanı sebebinden Ukraina Ceza kodeksiniñ 146-ncı maddesiniñ 1-inci qısmına istinaden (azatlıqtan qanunsız şekilde marum etüv) cinaiy tahqiqat başlattı.
Advokat Nazim Şeihmambetovnıñ malümatına köre, Prıhodko Aqmescit SİZOsınıñ mahsus blokunda tutula.
Bundan evel Prıhodko memuriy dava boyunca işğal etilgen Qırımda mesüliyetke çekildi.
Kreml kontrolindeki Qırımnıñ Saq rayon mahkemesi iyünniñ 25-nde qırımlığan 2 biñ ruble para cezasını berdi. Mahkeme onı Rusiye memuriy cinayetler kodeksiniñ 20.3 maddesiniñ birinci qısmına istinaden qabaatlı dep tanıdı. Qırım.Aqiqatnıñ elinde olğan mahkeme qararına köre, faalniñ evinde tintüv vaqtında tutıp alınğan eşya ve vesiqalarnıñ «tedqiqatı» «Prıhodko üçünci şahıslarnıñ bu eşya ve vesiqalarğa irişmesi vastasınen natsist timsallerini propaganda etkenini ve köstergenini» işaretlemekteN
Faalniñ özü evindeki bütün timsaller «antika», dava malümatında olğan svastikalı kölmek ise «suvenir» ve 2010 berli onda olmağanını ayttı.
2019 senesi fevralniñ 8-nde Qırımdaki FSB idaresiniñ hadimleri Oleg Prıhodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekkenler.
