Soçi şeeriniñ Umumiy yurisdiktsiya üçünci istinaf mahkemesi qırımlı cemaat jurnalisti, Aqmescitteki ekinci «Hizb ut-Tahrir davasınıñ» mabüsi Remzi Bekirovnı apiste qaldırdı. Bu aqta «Qırım birdemligi» cemaat birleşmesi haber ete.
«İstinaf şikâyetini 14 kâğıtta yazdıq, Qırım Cumhuriyetiniñ Yuqarı mahkemesi Remzi Bekirovğa qarşı ceza qanunlarını yañlış qullandı, hususan 4-ünci Jeneva konventsiyasını qullanmadı. Remzi mahkemede akvariumda tutula, amma Avropa mahkemesi bu insan itibarını aşalay, dep qayd etken edi. Masası bile yoq», – dedi advokat Edem Semedlâyev.
İmayeciniñ aytqanına köre, oturışuv qapalı oldı, çünki cemaat jurnalistiniñ maddesi ağır ola.
«O qadar qasevetlengen olsalar, qaravul arttırılsın, penceredeki parmaqlıqlar eyiliştirilsin, OMON ve Cezalarnı yerine ketirüv federal hızmetiniñ hadimlerine daa çoq avtomat berilsin dep muracaat ettik. Bugün Üçünci istinaf mahkemesinde açıq rejimde oturışuv oldı, amma Qırım Yuqarı mahkemesinde qapatıldı», – dep izaatladı Semedlâyev.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetov ve Remzi Bekirov bar ediler.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
