Mayısnıñ 13-nde Rusiyeniñ Rostov vilâyetindeki Taganrog şeer mahkemesi martnıñ 27-nde Qırımda keçirilgen kütleviy tintüvler neticesinde tutulğan Aqmescitteki ekinci «Hizb ut-Tahrir davasınıñ» dört mabüsiniñ apis müddetini uzattı. Seyran Murtaza, Enver Ametov, Mecit Abdurahmanov ve Rustem Seythalilov avgustnıñ 15-ne qadar SİZOda qalacaqlar, dep bildire Qırım.Aqiqat mühbiri.
«Er şey standart ve şablon oldı: 15 şaatnıñ sorğusı ve bir sıra tahqiqat tedbiriniñ keçirilmesi sebebinde sıñırlav tedbiriniñ ve SİZOda tutuluvınıñ uzatılması kerek olğanına dair aynı ibareler. Bu esnasta qanaatlendirilgen yekâne muracaat qarar seslendirilgende soy-soplarına kirmege izin berilmesi oldı», – dep haber etti advokat Ayder Azamatov Qırım.Aqiqatqa.
O, tahqiqat sırı olğan malümat seslendirilgeni içün mahkeme oturışuvı qapalı oldı. Faqat Rostov-na-Donuda keçken diger oturışuvlar açıq şekilde keçirile.
Taganrogdaki oturışuv prokuror Artur Şirâyevniñ teşebbüsi ile qapalı oldı, apiske alınğanlarnıñ faalleri ve tuvğanları mahkemege kirip olamadı.
Aynı vaqıtta, mahkeme binası içinde ve oturışuv salonında qoruvnı quvetleştirmek içün Rusiye politsiyasınıñ tahminen 30 hadimi ketirildi. Mabüsler esnasqa ketirilgende politsiya hadimleri «bir şey çıqmasın dep», mahkeme binasınıñ arqa çıqışına kelip mabüslerni körecek olğan faallerden dağılmalarını istedi.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde ve 28-nde Aqmescitniñ Kiyev rayon mahkemesi tutulğan faallerni apiske aldı.
Martnıñ 29-nda Rusiye uquq qoruyıcıları Qırımdaki tintüvlerden soñ qıdırılğan qırımtatar faali Edem Yayaçikovnı tutıp aldı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
Martnıñ 29-nda Qırımnıñ Rusiye ombudsmeni Lüdmila Lubina Qırım.Aqiqatqa bildirgenine köre, Qırımda tevqif etilgen 23 qırımtatar faalini Rusiyege alıp ketkenler.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
