Rusiyeniñ Rostov-na-Donudaki mahkemesi "Qırım musulmanları davası"nıñ beş faaline üküm çıqardı. Bunı "Gratı" ukrayin neşri haber etti.
Enver Ametov ve Yaşar Muyedinov 13 yıl sert apis cezasına mahküm etildi. İlk dört yılnı apishanede keçirmeli olacaqlar - eñ sert apis rejimi ile. Müddet bitken soñ ise daa bir yıl olarnıñ azatlığı sıñırılı olacaq. Sıñırlavlar yaşayış yeriniñ deñiştirilmesini, saat 22-den 6-ğa qadar evden çıqmaqnıñ, kütleviy tedbirlerde iştirakniñ yasaq etilmesini ve ayda eki kere nezaret organlarğa barıp qayd etilmekni köz ögünde tuta.
Osman Arifmemetov, Ruslan Suleymanov ve Rustem Şeyhaliv 14 yıl apis cezasına mahküm etildi. İlk dört yılnı olar apishanede keçirecekler. Müddet bitken soñ ise daa eki yıl olarnıñ azatlığı sıñırılı olacaq.
Evel prokuror Yevgeniy Kolpikov mahkemeden qırımtatar faalleri içün uzun müddetli apis cezasını istegen edi: Enver Ametov ve Ruslan Suleymanov 16 yıl, Osman Arifmemetov 16,5 yıl, Yaşar Muyedinov 15 yıl, Rustem Şeyhaliyev 17 yıl.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetov ve Remzi Bekirov bar ediler.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
