Qadı Aleksandr Generalov reisliginde Rostov-na-Donu Cenübiy okrugınıñ arbiy mahkemesi cuma künü, iyünniñ 4-nde, Aqmescitteki ekinci «Hizb ut-Tahrir davası» mabüsleriniñ apis cezasını üç ayğa uzattı. Bu aqta «Qırım birdemligi» cemaat birleşmesi haber ete.
Böylece, Seytveli Seytabdiyev, Akim Bekirov, Rustem Seythalilov, Asan Yanikov ve Eskender Suleymanov sentâbrniñ 17-ne qadar apiste qalacaqlar.
Faallerniñ bildirgenine köre, «Hizb ut-Tahrir» mabüsleriniñ sıñırlav tedbirini uzatuv muracaatını prokuror Sergey Aydinov oturışuv soñunda berdi.
«O, mabüsler şaatlarğa basqı yapa, qaçmağa tırışa bile, dep ayttı ve maddeleri ağır olğanını qayd etti. İmaye itiraz bildirip, Siyar Paniç bütün şaatlar sorğuğa çekildi, dep qayd etti, qalğan advokatlar oña qol tuttı ve mahkemeni mabüslerni apisten azat etmesine çağırdı», – dep bildirdi faaller.
«Hizb ut-Tahrir davasınıñ» mabüsi Akim Bekirov mahkemede delillerni elinde tuttı ve olarnı yoq etmege tırışmadı, dep bildirdi.
«Men normal şaraitlerde yaşamaq, yahşı aş aşamaq içün ev apsine razım, apiste furun böceklerinen oturmağa ve domuz etli ve küflü aş aşamağa istemeyim», – dep ayttı Bekirov.
Asan Yanikov mahkemede prokurornıñ delillerini sebepsiz saya, dep bildirdi, gizli şaatlarnı ise yalancı dep adlandırdı.
«Bir şey bilmese, ne kibi basqı yapa bilemiz?», – dep bildire Yanikovnıñ aytqanlarını faaller.
Mart ayında Kreml kontrolindeki Qırım Yuqarı mahkemesi Aqmescitteki ekinci «Hizb ut-Tahrir davasınıñ» mabüsi Asan Yanikovnıñ istinafını red etti. Advokat Safiye Şabanova Yanikov davasınıñ malümatlarını ögrenüv aqqını sıñırlağan Aqmescitteki Kiyev rayon mahkemesiniñ qararına qarşı istinaf şikâyetini berdi.
Hatırlatamız, fevralniñ 3-nde Vlasiha şeerindeki İstinaf arbiy mahkemesiniñ oturışuvında Aqmescitteki «Hizb ut-Tahrir davasınıñ» mabüsleri Seytveli Seytabdiyev, Akim Bekirov, Rustem Seythalilov, Asan Yanikov ve Eskender Suleymanov Rusiye mahkemesiniñ erkânını ve oturışuvdaki prokurornı çetleştirdi.
Yanvarniñ 18-nde Asan Yanikov ve Aqmescitteki ekinci «Hizb ut-Tahrir davasınıñ» diger mabüsi Seytveli Seytabdiyev Aqmescitten Rostov-na-Donu SİZO-1-ge etap etildi.
Rusiyeniñ Rostov-na-Donu Cenübiy okrugı arbiy mahkemesi Aqmescitteki «Hizb ut-Tahrir davasınıñ» mabüsleri Cemil Gafarov, Servet Gaziyev, Alim Karimov, Seyran Murtaza ve Erfan Osmanovnıñ apis müddetini yarım yılğa uzattı, soñra olarnı Aqmescit SİZOsından Rusiyege etap etecekler.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetov ve Remzi Bekirov bar ediler.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
