Rusiye uquq qoruyıcıları mahkümniñ adını ayta – bu 41 yaşında Sergey Saulâk. Muarririyet mahküm etilgen adamnıñ kimligini tasdıqlap olamay, onıñ advokatlarından bir izaat da yoq.
FSB malümatına köre, mabüs 2022 senesi dekabr ayında tutuldı. 2024 senesi mayıs ayında Rusiye mahkemesi onı «insanlarnı terror ücümine celp etkeninden» ve «devlet hainliginde» qabaatladı.
«O, Ukrayina mefküresiniñ tarafdarı olıp, 2016 senesi Ukrayina telükesizlik hızmeti tarafından işbirligine çağırıldı. SVO (mahsus arbiy operatsiya – Rusiye Ukrayinağa qarşı cenkni böyle adlandıra) başlağan soñ erkek çetel mahsus hızmetine Rusiye Arbiy küçleri aqqında para qarşılığında malümat bere edi», – dep aytıla haberde.
Bundan ğayrı, mahküm Ukrayina telükesizlik hızmetiniñ emrinen 2022 senesi yazda tanışını Aqyardaki memuriy binanı ateşke berüvge celp etken eken.
Yanvarniñ 20-nde Rusiyeniñ kontrolindeki Qırım Yuqarı Mahkemesi Yalta sakinini «devlet hainligi» sebebinden ğıyabiy şekilde 18 yılğa mahküm etti, dep haber etildi.
Yanvarniñ 17-nde Aqyarda yerli sakinniñ tutulğanı aqqında haber etildi, o, berilgen malümatqa köre, Rusiyeniñ Qara deñiz flotunıñ ava mudafaa bölükleriniñ yeri aqqında Ukrayina istihbaratına malümat bergen eken.
«Pervıy otdel» leyhasınıñ daa evel bergen malümatına köre, devlet hainligi, casuslıq ve gizli işbirligi davaları FSB tarafından provokatsiyadan soñ sıq-sıq uydurıla.
Aq qorçalayıcılar tahmin etkenine köre, devlet hainligi, casuslıq ve gizli işbirligi davaları bir qaç qat artacaqtır. Tedqiqatta aytılğanına köre, FSB aman-aman er kün böyle davalar aça, 2014 senesine qadar böyle davalar yılda eñ çoq 10 ola edi. Ukrayinağa qarşı büyük cenk başlağan soñ Ceza kodeksiniñ eñ ağır maddelerinden biri cenkke qarşı çıqqanlar içün eñ populâr oldı, dep aytıla tedqiqatta.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.