Mayısnıñ 13-nde ve 14-nde Rostov vilâyetiniñ mahkemelerinde martnıñ 27-nde Qırımda keçirilgen kütleviy tintüvler vaqtında tutulğan 23 qırımtatar faaliniñ sıñırlav tedbirini uzatuv oturışuvları keçirilecektir. Bu aqta «Qırım birdemligi» cemaat teşkilâtı Facebook saifesinde bildirdi.
Mayısnıñ 13-nde Rostov-na-Donu Lenin rayon mahkemesinde ve Taganrog şeer mahkemesinde Remzi Bekirov, Riza İzetov, Ruslan Suleymanov, Şaban Umerov, Seyran Murtaza, Enver Ametov, Mecit Abdurahmanov, Rustem Seythaliyevniñ oturışuvları keçirilecek.
Mayısnıñ 14-nde Rostov-na-Donunıñ Şahtinskiy şeer mahkemesinde, Oktâbrsk ve Kirov rayon mahkemelerinde Alim Karimov, Yaşar Muyedinov, Tofik Abdulgaziyev, İzet Abdulgaziyev, Cemal Gafarov, Erfan Osmanov, Asan Yanikov, Osman Arifmemetov, Vladlen Abdulkadırov, Server Gaziyev, Rustem Şeyhaliyev, Bilâl Adilov, Farhat Bazarov, Akim Bekirovnıñ oturışuvları olacaq.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde ve 28-nde Aqmescitniñ Kiyev rayon mahkemesi tutulğan faallerni apiske aldı.
Martnıñ 29-nda Rusiye uquq qoruyıcıları Qırımdaki tintüvlerden soñ qıdırılğan qırımtatar faali Edem Yayaçikovnı tutıp aldı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
Martnıñ 29-nda Qırımnıñ Rusiye ombudsmeni Lüdmila Lubina Qırım.Aqiqatqabildirgenine köre, Qırımda tevqif etilgen 23 qırımtatar faalini Rusiyege alıp ketkenler.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
