Rostov-na-Donu şeeriniñ Leninskiy rayon mahkemesi ekinci Aqmescit "Hizb ut-Tahrir davası" iştirakçisi Ruslan Süleymanovnıñ tevqifini uzattı. O SİZOda matrnıñ 14-ünece tutulacaq. Bunı Qırım.Aqiqatqa advokat Nazim Şeyhmambetov aytıp berdi.
"Mahkeme, Ukraina vatandaşı, qırımtatar Ruslan Süleymanovnıñ tevqifiniñ uzatılması aqqında tahqiqatçınıñ muracaatını qanaatlendirdi. Tahqiqatçı, Ruslan azat olsa, küç organlarından saqlana ya da şaatlarnı qorquza bileceginen añlattı. Biz bu sözlerni er oturışta eşitemiz - bir şey deñişmey. Yazıq ki, qanun bozulmasına baqmadan, mahkemeler bu muracaatlarnı qanaatlendire", - aytıp berdi advokat.
Şeyhmambetovnıñ aytqanına köre, müşterisi SİZOda olğance, FSB hadimleri onen sadece bir tahqiqat tedbirini keçirdi.
Noyabrniñ 11-inde Rostov-na-Donu şeeriniñ Leninskiy rayon mahkemesiniñ mahkemecisi Aleksandr Osipov ekinci Aqmescit "Hizb ut-Tahrir davası" iştirakçisi Ruslan Süleymanovnıñ tevqifini uzattı.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.Martnıñ 27-nde ve 28-nde Aqmescitniñ Kiyev rayon mahkemesi tutulğan faallerni apiske aldı.
Martnıñ 29-nda Rusiye uquq qoruyıcıları Qırımdaki tintüvlerden soñ qıdırılğan qırımtatar faali Edem Yayaçikovnı tutıp aldı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
