Rusiye mekteplerinde üç afta tatil olacaq – martnıñ 23-nden aprelniñ 12-ne qadar, dep bildirdi Rusiye maarif naziri Sergey Kravtsov. Onıñ qayd etkenine köre, mektep talebeleriniñ uzaqtan tasil almasına yardım etilecek, belli tasil resursları açılacaq, dep bildire «Nastoyaşçeye Vremâ».
Kravtsovnıñ aytqanına köre, bağ operatorları balalarnıñ uzaqtan oqumaları içün tasil resurslarını bedava açmağa azır, tasil edebiyatınıñ eñ büyük neşriyatları ise dersliklerini online şekilde açtı.
Aynı vaqıtta, tatil vaqtında mektepler tolusınen qapatılmaycaq, dep bildirdi Kravtsov. Başlanğıç sınıflar sıñırlı çalışacaq.
«Ana-babalar belli bir sebeplerden balalarını evde qaldırıp olamasa, Rospotrebnadzor talaplarına uyğun bir şekilde mektep talebelerini ketirmege mümkün olacaq», – dep qoştı nazir.
Daa evel Moskvada martnıñ 21-nden aprelniñ 12-ne qadar mekteplerni qapatmağa qarar alınğan edi. Paytahtnıñ bala bağçaları ise qapatılmadı, serbest qatnav qaldırıldı.
Martnıñ 20-nde başlanacaq yekâne devlet imtianlarınıñ vaqtından evelki müddeti baarden iyünniñ soñuna avuştırıldı. Bu aqta Rospotrebnadzor yolbaşçısı vazifelerini vaqtınca eda etken Anzor Muzayev bildirdi.
«32 biñ olğan vaqtından evelki müddetniñ iştirakçilerini tınçlandırmaq içün olar iyünge esas müddetke avuştırıldı. İmtian keçirilecek nizamda olğan yedek künleri bar, keçken yılları mezunlar o vaqıt imtian bere bile ediler. Şimdi qoşma müddetke ariza bergenler anda qaldırıla», – dedi Muzayev.
Onıñ bildirgenine köre, birisi belli sebeplerden iyünniñ soñundan evel imtian bermege istese, esas müddet içinde imtian bere bile.
Yekâne devlet imtianlarınıñ vaqtından evel etapını avuştırmaq qararı bazarertesi künü Rusiyede koronavirus yuqunçınıñ tarqaluvını ögüni aluv operativ ştabınıñ reberi olğan baş nazir muavini Tatyana Golikovanıñ toplaşuvında qabul etildi.
Rusiyede daa 21 insannıñ koronavirusı tasdıqlandı. Hastalarnıñ umumiy sayısı 114 kişi oldı.
Dünyada COVID-19 koronavirusınen hastalanğan 187 717 insan bar, ölgenlerniñ sayısı 7 822 kişi oldı, 79 biñden çoq insan tedaviylendi.
Keçken künü dünyada tasdıqlanğan hastalarnıñ sayısı 13 387-ge arttı, 737 insan can berdi.
