Vlasihadaki İstinaf arbiy mahkemesi qırımlı siyasiy mabüsler Oleg Födorov ve Ernest İbragimovnıñ ükmüni deñiştirmegen. Bunı "Qırım birdemligi" cemaat birleşmesi haber ete.
Mahkeme Cenüp bölge arbiy mahkemesiniñ qararını quvette qaldırdı — evel siyasiy mabüsler sert rejim cezahanesinde 13 yıl apis cezasına mahküm etilgen edi. İlk 3,5 yılnı eñ qıyın şaraitte — cezahanede keçirecekler.
Advokat Lilâ Gemeciniñ sözlerine köre, mahkeme mudafaa tarafınıñ delillerine, şu cümleden qabaatlav ve üküm içün temel olğan rusiyeli mütehassıslarnıñ ekspertizalar vaqtında yapqanı hatalarnı köz ögüne almağan. Öz qararını İstinaf arbiy mahkemesi 30 daqqa içinde çıqarğan.
2021 senesi fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
«Memorial» aq qorçalayıcı merkezi «qırımlı musulmanlar davasınıñ» mabüslerini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
