Mudafaa strategiyaları merkeziniñ idare organınıñ reisi, Ukraina Mudafaa nazirliginiñ sabıq başı Andriy Zagorodnük, Rusiye şantaj içün Qırımda özek bazasını qullanmağa istegenine emindir.
Bunı o «Novoye vremâ» radiosınıñ yaynında bildirdi.
«Sovet devrinde özek silâlarnıñ saqlanılğan arbiy bazalarnıñ, özek anbarlarınıñ yañıdan quruluvı bir qaç yıl evel başlandı. Bütün mütehassıslar bu muayyen bazalarnı bileler – bu Kefede ve Balıqlavada. Ve umumen, vastalı deliller çoqtır. Bazı ekspertler artıq anda olğanına inana, bazıları ise yaqında anda olacağını tüşüneler», – dedi Zagorodnük.
Onıñ sözlerine köre, Rusiye iç bir şeyge baqmadan Qırımda özek bazasını yerleştirgende Ukraina ve ABD istihbaratına malüm olacaq.
«Artıq anda yerleştirilgenine dair 100 faiz isbatlarımız olsa, Ğarpnıñ cevabı olduqça emiyetli olacaq, buña köre de ruslar bunı uzun meddet gizlemege tırışacaqlar, dep belleyim. Sual, bunı nege bunı yapalar? Rusiye Ğarpnı şantaj etmek içün bunı yapa, aytışmalar vaqtında sıqıştırmaq, üstün olmaq içün qullanacaq», – dep saya o.
Ukraina baş nazir muavini, vaqtınca işğal etilgen topraqlarnıñ reintegratsiya meseleleri naziri Oleksiy Reznikov ABDge kerçekleştirgen iş ziyareti vaqtında Jamestown Foundation reberi Glen Howard ile körüşip, Ukrainanı Rusiye arbiyleri tarafından Qırımda özek silâsınıñ yerleştirilmesinden imaye etmege çağırdı.
Ukraina Tış işler naziri Dmıtro Kuleba Foreign Affairs amerikan neşiri içün yazğan maqalesinde Rusiye Qırımda özek arbiy potentsialını arttıra, dep bildirdi.
Bundan ğayrı, Ukraina Tış işler naziriniñ birinci muavini Emine Ceppar«Ukraina 30» umumukrain forumınıñ toplaşuvında Rusiye işğal etilgenQırımda özek silâsını yerleştirmek içün infrastrukturasını abadanlaştırmağa devam ete, dep ayttı.
Rusiyeniñ işğal etilgen Qırımda özek silâsını ğayrıdan tiklegenini Ukraina halq deputatı, qırımtatar halqınıñ lideri Mustafa Cemilev de bildirgen edi.
2018 senesi oktâbr ayında o vaqıt Ukraina Tış işler naziri olğan Pavlo Klimkin Rusiyeniñ Qırımda özek silâsını yerleştirgenine ya da onıñ içün infrastruktura qurğanına dair şübheler bar, dep aytqan edi.
Rusiye Devlet dumasınıñ Qırım deputatı Andrey Kozenko Klimkinniñ aytqanlarını izaatlap, «RİA Novosti» neşirine «qomşu memleketniñ natsist reberligi qorqusınıñ sebepleri bar», dep ayttı.
1994 senesi Ukraina özek silâsından vazgeçti. Ukraina, ABD, Rusiye ve Büyük Britaniya Ukrainanıñ Özek silâsınıñ tarqatılmamasına dair añlaşmağa qoşulğanınen Telükesizlik kefaletleri memorandumını tizdi. Andaki maddeler Ukrainağa suverenitetini ve telükesizligini kefil ete.
