Ukraina baş nazir muavini, vaqtınca işğal etilgen topraqlarnıñ reintegratsiya meseleleri naziri Oleksiy Reznikov ABDge kerçekleştirgen iş ziyareti vaqtında Jamestown Foundation reberi Glen Howard ile körüşip, Ukrainanı Rusiye arbiyleri tarafından Qırımda özek silâsınıñ yerleştirilmesinden imaye etmege çağırdı.
«Rusiye Azaq deñizini işğal etti ve Qara deñizni bütünley askeriyleştirip, balansını deñiştirdi. Rusiyeniñ Qırımnı anda özek silâsını yerleştirmek içün azırlamasınen bağlı areketlerinden qasevetlenemiz. Rusiye Qırımğa esaslanıp, Yaqın Şarq ve Afrikada arbiy tedbirler keçire, Balkanlarğa tesir ete», – dep bildire Oleksiy Reznikovnıñ aytqanlarını avgustnıñ 10-nda Ukraina Tış işler nazirliginiñ matbuat hızmeti.
Reznikov «Ukraina içün telükesizlik paketi» kenişletilmeli, dep qayd etti.
«Birinciden – ava mudafaası quvetlerini qoyıp, atta Amerika bölüklerini yerleştirip. Qanunlarımız buña izin bere», – dep qayd etti Ukraina baş nazir muavini.
Ukraina Tış işler naziri Dmıtro Kuleba Foreign Affairs amerikan neşiri içün yazğan maqalesinde Rusiye Qırımda özek arbiy potentsialını arttıra, dep bildirdi.
Bundan ğayrı, Ukraina Tış işler naziriniñ birinci muavini Emine Ceppar«Ukraina 30» umumukrain forumınıñ toplaşuvında Rusiye işğal etilgenQırımda özek silâsını yerleştirmek içün infrastrukturasını abadanlaştırmağa devam ete, dep ayttı.
Rusiyeniñ işğal etilgen Qırımda özek silâsını ğayrıdan tiklegenini Ukraina halq deputatı, qırımtatar halqınıñ lideri Mustafa Cemilev de bildirgen edi.
2018 senesi oktâbr ayında o vaqıt Ukraina Tış işler naziri olğan Pavlo Klimkin Rusiyeniñ Qırımda özek silâsını yerleştirgenine ya da onıñ içün infrastruktura qurğanına dair şübheler bar, dep aytqan edi.
Rusiye Devlet dumasınıñ Qırım deputatı Andrey Kozenko Klimkinniñ aytqanlarını izaatlap, «RİA Novosti» neşirine «qomşu memleketniñ natsist reberligi qorqusınıñ sebepleri bar», dep ayttı.
1994 senesi Ukraina özek silâsından vazgeçti. Ukraina, ABD, Rusiye ve Büyük Britaniya Ukrainanıñ Özek silâsınıñ tarqatılmamasına dair añlaşmağa qoşulğanınen Telükesizlik kefaletleri memorandumını tizdi. Andaki maddeler Ukrainağa suverenitetini ve telükesizligini kefil ete.
