Qırım ve esas Ukrainanıñ memuriy sıñırındaki Rusiye FSBsiniñ sıñır noqtaları er vaqıttaki kibi çalışa, dep bildire aprelniñ 20-nde TASS Rusiye devlet haber agentligi quvet qurulışlarındaki menbalarğa esaslanıp.
Bu malümatqa köre, Ukrainadaki prezident saylavları ögüne memuriy sıñırdaki telükesizlik tedbirleri quvetleştirilmedi.
Keçiş noqtalarından keçken maşina ve vatandaşlarnıñ kirsetilüvi adiy rejimde kerçekleştirile.
Ukraina Devlet sıñır hızmeti Ukraina prezidenti saylavlarınıñ ekinci turı arfesinde Rusiye işğal etken Qırımnıñ memuriy sıñırında telükesizlik tedbirlerini quvetleştirdi, dep bildirgen edi.
Sıñırcılarnıñ qayd etkenine köre, «böyle tedbirler işğalcilerniñ provokatsiya areketilerine yol bermemek, işğal altındaki yarımadadan kelgen ve anda ketken vatandaşlarnıñ telükesizligini temin etmek içün alına».
6 biñden ziyade qırımlı ve aqyarlı Ukraina prezidenti saylavlarınıñ ekinci turında rey berüv yerini deñiştirdi.
Aprelniñ 21-nde Ukraina prezidenti saylavlarınıñ ekinci turı keçirilecek.
Ukraina prezidenti saylavlarınıñ birinci tur neticelerine köre, saylayıcılarnıñ 30,24%-ıVolodımır Zelenskıyge rey berdi, 15,95%-ı şimdiki devlet yolbaşçısı Petro Poroşenkoğa. Ekinci tur aprelniñ 21-nde olacaqtır.
