Rusiye akimiyeti aprelniñ 24-nden çetel arbiy ve devlet gemiler içün Qara deñizniñ üç bölgesini qapata.
Aprelniñ 24-nde «RİA Novosti»niñ Rusiye Mudafaa nazirliginiñ navigatsiya ve okeanografiya idaresine atfı etip bergen malümatına köre, er üç bölge de işğal etilgen Qırımnıñ sailindeki akvatoriyağa aittir. Aqyar ve Gurzuf arasındaki sail boyunca akvatoriya bölgesi, Keriç yarımadasındaki sail boyunca bölge ve yarımadanıñ ğarbiy qısmındaki bir bölge qapatılacaq.
Sıñırlavlarnı Rusiye aprelniñ 24-nden oktâbrniñ 31-ne qadar tayin etecek ola. Çetel memleketlerniñ arbiy gemileri ve devlet gemileri içün Qara deñizniñ üç bölgesinde tınç keçme aqqınıñ amelge keçirilmesiniñ toqtatılması planlaştırıla. Aynı zamanda Rusiyeniñ Mudafaa nazirligi, Qırım yaqıynlarında deñiz akvatoriyası qısmınıñ qapatıluvı «gemiler qatnavına mania olmaycaq», dep inandıra.
OSCE-de ABD-niñ meselelerinde muvaqqat vekâletlisi Kortni Ostrian, Rusiyeniñ işğal etilgen Qırım yaqınlarında Qara ve Azaq deñizlerinde gemiler qatnavını sıñırlağanından raatsızlıq bildirdi.
Hatırlatamız, NATO Rusiyeniñ Qara deñizdeki sıñırlavlarını takbih etti ve Qırımnıñ arbiyleştirilüvi aqqında hatırlattı.
Evel, Avropa Birligi, Rusiyeniñ Qara deñizdeki areketlerinden raatsız olğanını bildirdi.
Ukraina TİN, Rusiyeniñ arbiy talimler sebebi ile diger memleketlerniñ arbiy gemileri ve devlet gemileri içün Keriç boğazına taba Qara deñizniñ bir qısmınıñ 2021 yılnıñ oktâbr ayınace qapatılmasını ilân etkenine narazılıq bildirdi.
