Qırımtatar Milliy Meclis reisi Refat Çubarov Rusiye TİN başı Sergey Lavrovnıñ Qırım platforması ile bağlı bildirmesini Rusiyeniñ çaresiziligi dep sayğanını ayttı.
«Lavrovnıñ aytqanlarına kelgende, Rusiye reberligi çaresizliktedir, çünki Qırım platforması sayesinde, dünyada yüz bergen diger vaqialarğa baqmadan, şu cümleden Afğanistandaki vaziyet de, Qırımnıñ işğal azat etilüv meselesi kün tertipniñ yuqarısında», – «Ukrinform» Çubarovnıñ aytqanlarından alıntı ketire.
Onıñ sözlerine köre, Rusiye bunı pek begenmey. Çünki Qırımnı ilhaq etme ıntılıvına dünya yavaş-yavaş alışıp, qabul etecegi ve soñra da tanıp bunı başlaycağı ile bağlı taktikası doğru çıqmadı.
Evel, Rusiye TİN başı Sergey Lavrov, Kyivde olıp keçken «Qırım platforması»nıñ ilk sammitine «suniy şekilde yaratığan rusofob aktsiya» dedi.
Frenkistan Tış işler naziri Jan-İv Le Drian keçende Kyivde olıp keçken "Qırım platforması"na "ğayet müim diplomatik vaqia" dedi ve Frenkistan Qırım MC ve Aqyar şeeriniñ qanunsız ilhaqını iç bir vaqıt tanımağanını ve tanımacağını bildirdi.
Ukraina prezidenti Volodımır Zelenskıy Avropa Şurasınıñ prezidenti Şarl Mişelile soñ maqsadı Qırımnı Kyivniñ nezareti astına qaytarmaq olğan «Qırım platformasınıñ» ilerideki işi çerçivesinde diger halqara ortaqlar ile küçlerniñ koordinatsiyasını muzakere etti.
Kyivde avgustnıñ 23-nde «Qırım platformasınıñ» birinci sammitinde iştirak etken 43 memleket ve halqara teşkilât Ukraina topraq bütünligini halqara seviyede tanılğan sıñırlarda ğayrıdan tiklemege çağırğan ortaq Beyannameni imzaladı.
Ukraina Tış işler naziri Dmıtro Kuleba sammitte qabul etilecek beyannamağa temsilcileri Kyivge kelmegen devletler qoşula bile, dep bildirgen edi.
Rusiye sammit keçirilüvine qarşı naralızıq bildirgen edi. Moskva tedbirni «şabaş» dep adlandırdı ve iştirakçilerini aqibetler bekley, dep qorquza. Forum başlamazdan evel Rusiye akimiyeti Ukraina Tış işler naziri Dmıtro Kuleba ve Milliy telükesizlik ve mudafaa şurasınıñ kâtibi Oleksiy Danilovğa qarşı şahsiy sanktsiyalar kirsetti.
Rusiye kontrolindeki «Qırım platformasını» ve avgustnıñ 23-nde Kyivde olıp keçken sammitini «Ukraina sakinlerine Qırımnı işğalden qurtaruv faaliyetini köstermek» içün «informatsion fon» dep adlandırdı.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
