Rusiye blogeri Babçenko Ukrainanı terk etti. Bunı o Facebook saifesinde yazdı.
"Añlamayım, ne içün er kes o qadar aleket çıqardı? "Ukraina "X namzetini" saylasa - ekinci künü "mından coyulıp ketem" protsessini başlaycağım." Doğru yarım yıl evel yazılğan. Aman-aman kün-künde ola. Men ayttım. Men yaptım. Problema nedir?" - qayd etti Babçenko.
Rusiyeli muhalefetçi hurnalist Arkadiy Babçenko sağ, dep haber etti mayısnıñ 30-nda brifingte Ukraina Telükesizlik Hızmetiniñ (SBU) reisi Vasiliy Gritsak. Gritsaknıñ sözlerine köre, Ukraina Telükesizlik Hızmeti jurnalistniñ öldürilüvinen bağlı planlarnı meydanğa çıqarğan. SBU, öldürivni teşkil etmek içün Rusiye mahsus hızmetleri tarafından kiralanğan Boris German Ukraina vatandaşını tevqif etken. Babçenkonıñ öldürilgeninen bağlı malümat mayısnıñ 29-nda aqşam peyda olğan edi.
Babçenko Rusiyeni 2017 senesi fevral ayında terk etip, Pragada yaşap turmağa imkânı olsa da, Kyivde qırımtatar ATR telekanalında alıp barıcı olaraq çalışmaqnı saylağan edi.O, özüniñ Rusiyeden ketüv qararını oña qarşı cinaiy iş açılma ihtimali bar dep izah ete.
