Rusiye Beyazrusiyede özek silâsını yerleştirse, Avropa Birligi yañı sanktsiyalar kirsetecek, dep bildirdi Avropa Birligi diplomatiyasınıñ yolbaşçısı Josep Borrell.
«Rusiye özek silâsınıñ Beyazrusiyede yerleştirilüvi mesüliyetsiz bir kerginlikke sebep ola bile ve Avropa telükesizliginiñ havfı olaraq tanıla bile. Beyazrusiye bunı toqtata bile, bu olarnıñ saylavı», – dep yazdı memur Twitterde.
Onıñ qayd etkenine köre, Avropa Birligi Rusiye ve Beyazrusiyeniñ areketlerine sanktsiyalarnı kenişletip cevap bermege azır olacaq.
Martnıñ 25-nde Vladimir Putin Rusiye Beyazrusiyede taktik özek silâsını yerleştirecek, dep bildirdi – iyülniñ 1-ne qadar mahsus anbar qurucılığı yekünlenmeli. Bundan ğayrı, Minskke «İskander» raketa kompleksi ve özek raketalarını taşığan uçaqlar berildi.
Putinniñ aytqanlarına köre, qarar Büyük Britaniya Ukrayınağa işlengen uran snarâdlarını bermege niyeti bar dep bildirgen soñ alındı. Bular özek silâsı olmay. Lâkin Moskva niyetlerge sert bir şekilde cevap berip, Londonnı kerginlikte qabaatladı ve cevap tedbirleri aqqında vade etti.
Ukrayına Milliy telükesizlik ve mudafaa şurasınıñ kâtibi Oleksiy Danılov Putinniñ Beyazrusiyede taktik özek silâsını yerleştirecegine dair laflarını bu memleketniñ iç kerginleştirilüvine bir adım olaraq tasvirley. Onıñ fikirince, o, Beyazrusiye cemiyetinde Rusiye ve Putinge menfiy baquv seviyesini bayağı arttıra. «Kreml Beyazrusiyeni özek reineleri arasına aldı», – dep ayttı Danılov. Ukrayına prezidenti ofisiniñ mesleatçısı Mıhaylo Podolâk Putinniñ qararını Moskvada Ukrayınağa qarşı cenkni yutquzğanını añlağanlarınıñ bir işareti dep saya.
Ukrayına Rusiye prezidenti Vladimir Putinniñ Beyazrusiyede Rusiye özek silâsını yerleştirecegine dair beyanatı sebebinden BM Telükesizlik toplaşuvını acele toplamğa talap etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
