Aqmescitteki Taras Şevçenkonıñ abidesi yanında meşur ukrain şairi ve ressamı doğğanınıñ 205 yılı munasebetinen merasimler keçirildi.
Qırım.Aqiqat mühbiriniñ bildirgenine köre, başta Kobzarnıñ abidesi yanında Aqmescit şeer şurasınıñ deputatı, istifağa çıqqan siyasiy hadim-zabit Sergey İliçevniñ reberligi altında Rusiye tarafdarları miting keçirdi. İştirakçileri Rusiye bayraqları ve «Qırımnıñ rus cemiyeti» bannerinen keldi.
Mitingde çıqışta bulunğan Kreml kontrolindeki «Qırımnıñ ukrain cemiyeti» reisi Anastasiya Gridçina «banderciler Şevçenkonıñ adını haris maqsadlarında» qullana ve o, «ruslardan nefret etmegen edi», dep ayttı. Onıñ fikirince, Şevçenko – «üç slavân halqınıñ birleşken sıması».
Çıqışta bulunğan bazı insanlar Şevçenkonı «rus yazıcısı» dep adlandırdılar.
Haber etilgeni kibi, Rusiye tarafdarlarınıñ miting iştirakçileri Şevçenkonıñ abidesine çeçek qoyıp, oña bağışlanğan şiirler oqudı.
Tedbir vaqtında nizamnı Rusiye politsiyası ve Qırım «samooboronasınıñ» eki vekili közetti.
Rusiye tarafdarlarınıñ mitinginden soñ Şevçenkonıñ abidesi yanında aqmescitli ukrainler toplaştı. Olar Ukraina devlet bayrağınıñ renklerinde çeçek qoyıp, Kobzarnıñ sevimli şiirlerini oqudı ve onıñ sözleri esasında yazılğan belli «Reve ta stogne Dnipr şırokıy» yırını icra etti.
Ukrainada martnıñ 9-nda ukrain şairi ve ressamı Taras Şevçenko doğğanınıñ 205 yılı qayd etile.
Yalta sakinleri Şevçenkonıñ abidesine çeçek qoydı.
Taras Şevçenko 1814 senesi martnıñ 9-nda dünyağa kelip, edebiyat ve ressamlıq icadı sayesinde meşur oldı. O, ukrain medeniyetiniñ eñ büyük timsallerinden biri ola.
