İşğal etilgen Qırımdaki Rusiye Cezalarnı yerine ketirüv federal hızmetiniñ idaresi Qırım.Aqiqatqa bildirgenine köre, Aqmescitteki ekinci «Hizb ut-Tahrir davasınıñ» mabüsi, siyasiy mabüs Cemil Gafarov tibbiy yardımğa muhtac degil.
Bu aqta Qırım.Aqiqatqa Qırımdaki Rusiye Cezalarnı yerine ketirüv federal hızmetiniñ matbuat hızmeti bildirdi.
«Kütleviy haber vastalarında SİZO-1-de bulunğan şübheli Cemil Gafarov oña kösterilmegen acele tibbiy yardımğa muhtac, dep bildirilgen edi. Bu malümat doğru degil», – dep aytıla haberde.
Rusiye apishane vekilleri, Gafarov «hastalıqları boyunca terapevt ekimi tarafından muntazam sürette baqıla, bir qaç kere diger ekimlerge baqtırıldı, hastahanege çıqarıldı», dep bildire.
«Al-azırda Gafarov D. umumiy vaziyeti bir qarar, acele tibbiy yardım kösterilüvine muhtac degil. Tahqiqat izolâtorındaki milliy bölük filialınıñ ekimlerinden mesleat ala, kerekli ilâclar ala. Tibbiy bölük hadimleri şübhelini mütehassıs ekimlerge baqtırmağa çıqarmaq içün kerekli vesiqalarnı azırladı. Onı planğa köre alıp ketecekler», – dep bildire müessise.
Cezalarnı yerine ketirüv federal hızmetiniñ malümatına köre, tibbiy bölük hadimleri, tutulğan şahıslarğa vaqtında yardım etmek, şikâyetlerini ve arizalarını almaq içün er kün kameralarnı dolaşa.
Daa evel Cemil Gafarov yanvarniñ 28-nde tibbiy tedqiqlerge çıqarılacaq, dep haber etilgen edi.
Yuqarı Radanıñ insan aqları vekâletlisi Lüdmila Denisova işğal etilgen Qırımdan ukrainalı siyasiy mabüs Cemil Gafarov (Qırımdaki «Hizb ut-Tahrir davalarınıñ» mabüsi) sağlıq vaziyeti fenalaşqanını bildirgen edi. Şu sebepten Denisova Rusiye ombudsmeni Tatyana Moskalkovağa muracaat etip, Ukraina vatandaşlarınıñ tibbiy tedqiqi içün yardım etmesini rica etti.
Daa evel Gafarovnıñ advokatı müvekkiliniñ alı kritik oldı, dep qayd etken edi. Cemil Gafarov üçünci derece saqatı, büyrekleri hasta ve yürek hastalıqları bar. Advokat Gafarovğa ilâc bermeyip, hastahanege avuştırmağa razı olmadılar, dep qoştı.
2019 senesi martnıñ 27-nde Rusiye İç işler nazirligi ve Rusiye gvardiyasınıñ hadimleri Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal tutuldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
