Rusiye akimiyeti ilhaq etilgen Qırımda dizel yaqıtınıñ fiyatını ucuzlatmağa söz bere: yaz yaqıtınıñ litri, qış yaqıtına köre, 1,1 rublege ucuzca olacaq. Böylece, Qırım ve Krasnodar ülkesi arasında fiyatlarnıñ farqı azlaşmaq kerek. Bu aqta “Rossiya-24” televizion kanalınıñ efirinde Rusiye baş naziriniñ muavini Dmitriy Kozak aytıp berdi.
“Cermaycılarnen soñki muşaveremizde añlaştıq ki, qış yaqıtından yaz yaqıtına keçkende, yaz fiyatlarını da qaytarmaq kerek olacaq. Soñki muşaveremiz tek tünevin oldı, ve anda bir qararğa keldik - dizel yaqıtınıñ fiyatı 1 ruble 10 kapikke tüşürilecek. Bugün Qırım ve Krasnodar ülkesiniñ arasında farq - 3 rubledir. O azlaşacaq”, - dedi o.
Daa evel Rusiye baş naziriniñ muavini Dmitriy Kozak, Rusiye akimiyeti ilhaq etilgen Qırımda benzin ve dizel yaqıtınıñ fiyatlarını turğunlaştırmaq içün tedbirler azırlağanını bildirdi. Olar yılnıñ ortasına qadar Qırım fiyatlarını Rusiye fiyatlarınen bir etecek ola.
2019 senesi martta “TES” Qırım yaqıt şirketiniñ stantsiyalarında benzin fiyatınıñ paalılaşması qayd etildi.
Aprel ayında Rusiye antimonopol hızmeti yarımadağa cermay mahsulatlarını teslim etken doquz şirketke qarşı dava açtı.
Qomşu Rusiyege köre Qırımda benzin fiyatları yüksekçe olğanını ve bu Keriç keçitiniñ işine bağlı olğanını iyülniñ ortasında Qırımnıñ rusiyeli başlığı – Sergey Aksönov qayd eteken edi.
