Rusiye baş naziriniñ muavini Dmitriy Kozak, Rusiye akimiyeti ilhaq etilgen Qırımda benzin ve dizel yaqıtınıñ fiyatlarını turğunlaştırmaq içün tedbirler azırlağanını bildirdi. Olar yılnıñ ortasına qadar Qırım fiyatlarını Rusiye fiyatlarınen bir etecek ola.
Bu aqta o Yaltada iqtisadiy forumda bildirdi, dep haber ete “Krıminform” matbuatı.
“Bütün Rusiyeden farqlı olaraq, Qırımda Yañı yıldan soñ benzin foyatları yüksetilmegen edi, dizel yaqıtınıñ fiyatları ise, Rusiyege köre, azca köterile edi. Biz bir sıra tedbirler kördik, tafsilâtnı açmacam, amma Qırım yarımadasına yaqıt temin etecek bir qaç yañı şirket de taptıq. Şimdi Qırımğa yaqıtnıñ teslimatını temin etmeknen bağlı meseleler çezile. Menimce, Qırım fiyatlarını Rusiye fiyatlarınen teñ etip olurıq. Yılnıñ ortasına qadar”, - dedi o.
2019 senesi martta “TES” Qırım yaqıt şirketiniñ stantsiyalarında benzin fiyatınıñ paalılaşması qayd etildi.
Aprel ayında Rusiye antimonopol hızmeti yarımadağa cermay mahsulatlarını teslim etken doquz şirketke qarşı dava açtı.
Qomşu Rusiyege köre Qırımda benzin fiyatları yüksekçe olğanını ve bu Keriç keçitiniñ işine bağlı olğanını iyülniñ ortasında Qırımnıñ rusiyeli başlığı – Sergey Aksönov qayd eteken edi.
