Rusiye kontrolindeki Qırım ükümetiniñ yolbaşçısı Yuriy Gotsanük bildirdi ki, onıñ malümatına köre, işğal altındaki yarımadada azıq mallarınıñ yedegi 30 künge yetmeli. Bu aqta o, aprelniñ 20-nde koronavirus yuqunçınıñ tarqaluvına qarşı tedbirler vaziyetine dair maruzası vaqtında ayttı.
«Alış-veriş ağlarında ealini 30 kün devamında azıq mallarınen temin etmek içün yeterli qadar azıq mallarınıñ yedegi bar… Aprelniñ 20-nde ilk ihtiyac azıq mallarınıñ fiyatı stabildir», – dep bildire Gotsanük.
Aprelniñ 20-ne qadar yarımadada 63 koronavirus hastası qayd etildi, 18-i – Aqyarda.
Qırımda ve Aqyarda özüni izolâtsiya etüv rejimi aprelniñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
