Yarımadanıñ farqlı köşelerinde yaşağan qırımtatarlar Kreml kontrolindeki Aqmescit Kiyev rayon mahkemesiniñ qadın faali, aq qorçalayıcı Lutfiye Zudiyeva ve «Qırım balalığınıñ» koordinatorı, Bağçasaraydaki «Hizb ut-Tahrir davası» mabüsiniñ ömür arqadaşı Mümine Saliyevağa bergen para cezalarını ödemek içün para topladı. Bu aqta qadın faalleri Qırım.Aqiqat mühbirine ayttı.
Para cezalarını ödemek içün para adet üzre 10 rublelik kapiklernen toplandı.
Faallerniñ qayd etkenine köre, para cezaları şikâyet etilecegine baqmadan, insanlar kerek olğan 3 biñ rubleden çoq berdi.
«Qarar endi-endi çıqarıldı, ve men para cezasını ödemek kerek dep tüşünmeyim. İleride daa istinaf ve «aleket» bar. Amma halqımız qayğırğan olmaqnen beraber insan problemlerini al etmek kerek dep strategik baqa. Quvet müessiseleriniñ areketleri insanlarğa tesir etti. Olar musafirlikke tek çeçek ketirmey, amma 10 rublelik kapikler de ketire», – dep tarif etti Mümine Saliyeva.
Qadınlar toplanğan paranı apiske alınğan qırımlılarnıñ balalarına bermege istey.
Rusiye kontrolindeki Aqmescit Kiyev rayon mahkemesi mayısnıñ 31-nde qırımtatar faali ve aq qorçalayıcısı Lutfiye Zudiyevanı Rusiye Memuriy cinayetler kodeksiniñ 20.3 maddesini (yasaqlanğan teşkilâtnıñ timsallerini numayış etüv) bozğanında qabaatlı tanıp, oña 2000 ruble para cezasını berdi.
Aqmescitniñ Kiyev rayon mahkemesi mayısnıñ 31-nde qırımtatar faali, Bağçasaraydaki ekinci «Hizb ut-Tahrir davası» mabüsiniñ ömür arqadaşı Mümine Saliyevanı Rusiye Memuriy cinayetler kodeksiniñ 20.3 maddesini (yasaqlanğan teşkilâtnıñ timsallerini numayış etüv) bozğanında qabaatlı tanıp, oña 1000 ruble para cezasını berdi.
Rusiye quvetçileri mayısnıñ 30-nda eki qırımtatar faalini tuttı: aq qorçalayıcı ve vatandaş jurnalisti Lutfiye Zudiyevanı ve Bağçasaraydaki «Hizb ut-Tahrir davası» mabüsiniñ ömür arqadaşı, «Qırım balalığı» teşebbüsiniñ koordinatorı Mümine Saliyevanı. Ekisi de Rusiye Memuriy cinayetler kodeksiniñ 20.3 maddesine istinaden qabaatlana – yasaqlanğan timsallerniñ numayışı. İşbu madde boyunca memuriy apis cezası berile.
Zudiyevanıñ aytqanına köre, dava malümatlarında qullanıcı Tagir Minibayevniñ 2014 senesi aprel ayında paylaşqan yazısı bar, Zudiyeva anda qayd etile.
Ukraina Tış işler naziri Pavlo Klimkin dünya toplulığını mayısnıñ 30-nda ilhaq etilgen Qırımda tutulğan qırımtatar aq qorçalayıcıları Lutfiye Zudiyeva ve Mümine Saliyevanıñ azat etilüvini talap etmesine çağırdı.
Al-azırda Qırım ve qomşu Rusiyeniñ müessiseleri bir de bir izaat bermediler.
