Salı künü saba saat 3:07 Rostov-na-Donu şeerinden ilhaq etilgen Qırımğa ketken yolda, Keriç köprü yanında, rusiye polisi, Cenübiy Bölge Arbiy mahkemesinde keçken mahkeme oturışına diñleyici olaraq barğan yarımada sakinlerinen maşnanı toqtattı.
Bunı "Qırım birdemligi" cemiyet birleşmesi bildire.
"Mikroavtobusnıñ üç yolcusı: 1975 yılı doğma Osmanov Ansar İsmailoviç, 1960 yılı doğma Kerimov Ali Naimoviç, 1984 yılı doğma Süleymanov Amet Refatoviçni tutıp aldılar ve olar şimdige qadar İİN-niñ binasında buluna. Başta olarnı cinayetke dair bir anketanı toldurmağa mecburladılar, soñra zornen daktiloskopik ekspertizanı keçirecek ediler, amma tutulğanlar bunı red etti", - denile beyanatta.
Birleşmeniñ malümatı köre, İİN-niñ hadimleri adamlarnıñ vesiqalarını tutıp aldı. Saat 6:30 itibaren vesiqalarnı keri qaytarmadılar.
"Tutılıp aluvdan üç saattan çoq keçkeninden soñra, olarnen iç bir tedbirley yapılmay. Amma İİN-niñ hadimleri vesiqalarnıñ qaytarmayıp, iş hanesinde qapaldılar", - yazalar "Qırım birdemligi"nde.
Başqa menbalardan bu malümatnıñ tasdıqı yoq. Bu aqta Rusiye polisiniñ şimdilik tefsiri yoq.
Tünevin, oktâbr 21-isinde Rostov-na-Donu Rusiye şeerinde "Hizb ut-Tahrir davası" boyunca mahkeme oturışı keçe edi. Bu dava boyunca oturış oktâbr 22 ve 23-ünde de devam etecek, üküm çıqarılacağı beklenile.
Rusiye prokurorı, beraber qoşıp sayğanda, Yalta "Hizb ut-Tahrir davası"nıñ iştirakçileri içün 98,8 yıllıq apis cezasını istedi: Muslim Aliyevğa - 20 yıl, İnver Bekirovğa - 20,6 yıl, Emir-Üsein Kukuğa - 15 yıl, Vadim Sirukqa - 15 yıl, Arsen Cepparovğa - 13,6 yıl, Refat Alimovğa - 14,6 yıl.
Bu dava boyunca qabaatlanğanlar 2016 yılınıñ fevral-aprel aylarında tutulğan edi. Olarnı, Rusiyede yasaqlanğan islâmiy siyasiy "Hizb ut-Tahrir" teşkilâtına aitliginde qabaatlaylar.
Ukrainanıñ Tış İşler Nazirligi, Yalta "Hizb ut-Tahrir davası"nıñ iştirakçilerini azat etmege Rusiyeden talap ete.
