Rospotrebnadzor Qırımda koronavirusnıñ tarqaluv vaziyetini qıyın dep saya, hasta sayısı arta, dep bildirdi Qırım ve Aqyardaki Rospotrebnadzor idaresiniñ reberi Natalya Penkovskaya.
«Hastalıq seviyesi arta. Ciddiy seviyede arta. Ve bugünki künde, ne yazıq ki, yolbaşçınıñ buyruğında qabul etilgen sıñırlavlarnı kirsetmege mecbur oldıq», – dep bildire Penkovskayanı TASS Rusiye haber agentligi.
Qırımnıñ baş sanitar ekimi yarımadada «kollektiv immunitet aytmağa mümkün degil».
«Yañı koronavirus yuqunçı boyunca epidemiologik vaziyetni tek yolbaşçınıñ buyruğınen qabul etilgen sıñırlav tedbirlerini kirsetip idare etmek mümkün», – dep qoştı Penkovskaya.
İyünniñ 22-nde Qırımda hastalıq artqanı içün pandemiya sebebinden kirsetilgen sıñırlavlar kene sertleştirildi.
Turizm ve hızmetler saalarınıñ hadimlerini koronavirustan aşılamağa tevsiye etildi. Sentâbrniñ 1-ne qadar cemaat aşağan yerlerniñ gece işi, eglence terdbirleriniñ keçirilüvi yasaqlandı. Aqmescit ve Aqmescit rayonında, Yalta ve Aluştada diskoteka ve gece klublarınıñ işi yasaqlandı. Teatr ve kinoteatrlerde zallarnıñ 50%-dan çoq bilet satışı yasaqlana.
Rospotrebnadzor malümatına köre, pandemiya başlağanından Qırımda 46,5 biñ koronavirus hastası qayd etildi. 42 biñ kişi tüzeldi, tahminen 1,5 biñ insan vefat etti.
Hatırlatamız, keçken künü Qırımda 6 koronavirus hastası vefat etti, iyünniñ 27-nde yarımadada 276 koronavirus hastası qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
