Rospotrebnadzor Qırımda COVID-19 hastaları vaziyeti stabilleşti, dep bildirdi. Bu aqta iyülniñ 23-nde müessise yolbaşçısı Anna Popova Rusiye prezidiumınıñ koronavirus ile küreş koordinatsion şurasınıñ toplaşuvında ayttı.
«Stabilleşüv tendentsiyaları bar. Qırımda 27 regiondan üçünde hasta sayısı eksilgenini köremiz, Aluştada da, 12-sinde stabilleşüv bar, daa 12-nde artış devam ete. Kurort olğan Yalta, Kefe, Sudaq ve Aqyarda hasta sayısı arta», – dep bildirdi Popova.
Hatırlatamız, keçken künü Qırımda 386 yañı COVID-19 hastası qayd etildi. Yedi insan koronavirus yuqunçından vefat etti.
Qırım akimiyeti, iyülniñ ortasında yarımadada koronavirus pandemiyası vaziyeti kerginleşti – em hasta sayısında, em vefat sayısında antirekord qayd etile, dep bildire. Qırımnıñ Rusiye yolbaşçısı Sergey Aksenov turist mevsimi vaqtından evel qapatıla bile, dep ayta.
Qırım ve Aqyardaki Rospotrebnadzor yolbaşçısı Natalya Penkovskayanıñ iyülniñ 21-nde koronavirus yuqunçı ile küreş operativ ştabınıñ oturışuvında bildirgenine köre, Qırımda Sudaq ve Kefe COVID-19 hasta sayısına köre lider oldı, Yalta, Aluşta ve Aqmescitte de hasta sayısı tez arta.
Qırımdaki Rusiye sağlıq nazirliginiñ yolbaşçısı Aleksandr Ostapenko iyülniñ 21-nde hastahanege alınğan COVID-19 hastalarınıñ sayısı rekord oldı, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
