Qırımda keçken künü yedi insan koronavirus yuqunçından vefat etti, COVID-19-dan vefat etkenlerniñ sayısı ise 1684 insan oldı, dep bildire iyülniñ 23-nde Qırımnıñ Rusiye sağlıq nazirliginiñ matbuat hızmeti.
Müessiseniñ malümatına köre, al-azırda 3466 insan ambulator tedaviylevde buluna, 3209 kişi COVID-19 ve pnevmoniya diagnozlarınen hastahanede yata.
Hatırlatamız, keçken künü Qırımda 386 yañı COVID-19 hastası qayd etildi.
Qırım akimiyeti, iyülniñ ortasında yarımadada koronavirus pandemiyası vaziyeti kerginleşti – em hasta sayısında, em vefat sayısında antirekord qayd etile, dep bildire. Qırımnıñ Rusiye yolbaşçısı Sergey Aksenov turist mevsimi vaqtından evel qapatıla bile, dep ayta.
Qırım ve Aqyardaki Rospotrebnadzor yolbaşçısı Natalya Penkovskayanıñ iyülniñ 21-nde koronavirus yuqunçı ile küreş operativ ştabınıñ oturışuvında bildirgenine köre, Qırımda Sudaq ve Kefe COVID-19 hasta sayısına köre lider oldı, Yalta, Aluşta ve Aqmescitte de hasta sayısı tez arta.
Qırımdaki Rusiye sağlıq nazirliginiñ yolbaşçısı Aleksandr Ostapenko iyülniñ 21-nde hastahanege alınğan COVID-19 hastalarınıñ sayısı rekord oldı, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
