Rospotrebnadzor başı Anna Popova işğal etilgen Qırımda yañı koronavirus yuqunçınen hastalanuv seviyesini “eterli derecede yüksek” dep adlandırdı.
“Bugun tahmin etilgen havflar, şübesiz, kerçekleşkenini köremiz. Çünki İrkutsk, Nijnegorsk, Novosibirsk vilâyetlerinde, Qırım Cumhuriyetinde, Stavropol ülkesinde hastalanuv seviyesi yeterli derecede yüksektir”, – salı künü “COVID-19 koronavirus yuqunçı aqqında yañı ilmiy malümat” virtual konferentsiyası vaqtında dedi, yaza TASS.
Qırım ve Aqyardaki Rospotrebnadzor idaresi Qırımda koronavirus hastalarınıñ sayısı artmay, dep bildire.Bu aqta müessise yolbaşçısı Natalya Penkovskaya noyabrniñ 11-nde bu yuqunç ile küreş operativ ştabınıñ toplaşuvında ayttı.
Tünevin Qırımda 155 yañı koronavirus hastası qayd etilgen edi. Pandemiya başlağanından episi olıp 12522 Covid-19 hastası qayd etilgen, 8080 tedaviylengen soñ hastahaneden çıqarılğan, 218 ölgen.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
