Qırım ve Aqyardaki Rospotrebnadzor idaresi Qırımda koronavirus hastalarınıñ sayısı artmay, dep bildire.
Bu aqta müessise yolbaşçısı Natalya Penkovskaya noyabrniñ 11-nde bu yuqunç ile küreş operativ ştabınıñ toplaşuvında ayttı.
«Maska taquv rejiminiñ neticesini köremiz. Şimdilik tahminlerini aytmaq erte, amma vaziyet stabil olğanını endi köremiz. Hasta sayısı artmay, eki aftadan berli koronavirus hastalarınıñ sayısı artmağanını köremiz», – dep işandıra Penkovskaya.
Onıñ aytqanına köre, bu vaziyetni saqlap qalmaq içün ileride qoşma sıñırlav tedbirleri kirsetile bile. Ne aqqında aytqanını añlatmadı.
Onıñ qayd etkenine köre, Qırımda keskin nefes virus yuqunçı ve gripp hastalarınıñ sayısı eksile – epidemiologik seviyeden 25% az,
Oktâbr ayında Rospotrebnadzor Qırımdaki epidemiologik vaziyet fenalaşa, dep bildirgen edi.
Keçken künü 207 koronavirus hastası qayd etildi. 7129 insan tüzeldi. Bir kün evelsi berilgen malümatqa köre, Qırımda bir künde 15 insan koronavirustan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
