«Rosgeologiya» mütehassısları, Azaq deñizniñ tübünde tapılğan tatlı suv ihtiyatlarınıñ keyfiyetini ve miqdarını belgilemek içün yalığa yaqın 500 metr terenligine qadar qoşma quyular qazmağa planlaştıralar.
«Şirket yerastı suvlarınıñ yedekleriniñ miqdarını ve keyfiyetini belgilemek içün işini devam etecek. Bunıñ içün 500 matr terenligine qoşma quyular qazılacaq», – dedi «Rosgeologiya» müdiri Sergey Görkov.
Rusiye baş nazir muavini Marat Hunsullin iyülniñ 30-nda Qırımğa ziyareti vaqtında Azaq deñizi altıdan çıqarılğan ilk temiz suv partiyası aqqında ilân etti.
Rusiye baş nazir muavini, Qırım «kuratorı» Marat Hunsullin, Azaq deñizi altından suv çıqarmaq içün quyular yaznıñ ortasında qazılacaq, dep bildirdi.
Rusiye prezidenti Vladimir Putinniñ fikirince, Qırımda tatlı suv yete. Onıñ aytqanına köre, Qırımğa yaqın suvlarda, Azaq deñizi altında yedekler bar.
Azaq deñizinde tatlı suv yedeklerini tapmaq içün Rusiye 70 million rubley masraf etecek ola.
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
