Rusiye kontrolindeki Aqmescitniñ Kiyev rayon mahkemesi qırımtatar faali Rolan Osmanovğa qarşı protokolnı o iştirak etmese de, baqmağa qarar berdi. Bu aqta faalniñ advokatı Qırım.Aqiqatqa bildirdi.
«Rolannen mahkemege keldik, amma pasport kontrolinden keçip, odağa çıqqance protokol biz olmağanda baqıldı ve qadı mesleat odasında buluna, dep haber etildi», – dep tarif etti advokat.
Uquqçı protokol 2023 senesi mart ayınıñ ortasında tizildi, dep hatırlattı. Osmanovnıñ evinde tintüv keçirildi, bundan soñ faalni Rusiye FSB idaresine sorğuğa alıp ketkenler. Bina çıqışında Osmanovnı «E Merkeziniñ» (Rusiye Federatsiyasınıñ İç işler nazirliginiñ ekstremizm ile küreşniñ baş idaresi) hadimleri tuttı ve Rusiye İç işler nazirliginiñ binasına alıp kettiler.
«Bu sefer – kiçik kiberâramazlıq. Rolannı internette biraz yaramazlıq yapqanında qabaatlaylar. Rolan bıltır küzde keçirilgen qısmiy seferberliknen bağlı fikrini aytqan eken. O, bir çoq insan, hususan qırımtatarlar Qırımdan kete dep fikirlerini paylaşqan edi», – dep añlattı uquqçı.
Osmanovnıñ imayesi protokol qararını şikâyet etmek niyetinde. Faal davanı «saçma» dep, onı qırımtatar cemaatı içün «ifade çerçiveleriniñ» şekillendirilüvi dep saya.
Rolan Osmanov – qırımtatar faali, vatandaş jurnalisti ve strimer. O, «restavratsiya» manaçığınen Han sarayınıñ yoq etilüvine qarşı narazılıq bildirgen edi.
2022 senesi iyülniñ 13-nde «Nariman Celâl davasınıñ» esnası keçirilgen Rusiye Qırım Yuqarı mahkemesiniñ binası ögünde 39 yaşında Rolan Osmanovğa vatandaş urbasında, maskalı insanlar kelip tuttı. Daa soñra alınğan malümatqa köre, onı advokatlarnı tutuv ile alâqası olğan «E» merkeziniñ yolbaşçısı Ruslan Şambazov tuttı. Onıñ qararında Osmanov Facebook saifesinde «Rusiye Federatsiyasınıñ silâlı quvetlerini itibardan tüşürgen» paylaşuvlar yaptı, dep aytıla. «E» bölügine barmaq talabını red etti, er şeyni cep telefonına çıqardı, «itti» ve «tirendi». Onıñ areketleri Rusiye Federatsiyası Memuriy uquq bozuvları kodeksiniñ 19.3 maddesiniñ 1-nci qısmına istinaden memuriy protokol temeli oldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
