Link açıqlığı

Saatnıñ esas haberi

Rusiye FSBsi tutulğan qırımtatar faali Rolan Osmanovğa advokatlarnı almadı


Rolan Osmanov
Rolan Osmanov

Rusiye Federatsiyasınıñ FSB hadimleri tintüvden soñ tutulğan vatandaş jurnalisti, qırımtatar faali Rolan Osmanovğa advokat Edem Semedlâyevni kirsetmedi. Bu aqta Semedlâyev «Qırım birdemligi» cemaat birleşmesine tarif etti.

«Saat 11:00-de FSB binasına Osmanovğa uquqiy yardım köstermek içün keldim. Nevbetçi FSB hadimi kelir, dep ayttı. Soñra özüni FSB mayorı Alekseyçuv Ruslan Antonoviç olaraq tanıtqan bir hadim çıqıp, uquqiy mesleatçı ola, dep bildirdi. O, Osmanov mında Buluna ve FSB hadimleri bazı tedbirler keçire, dep ayttı, amma nasıl bir tedbir olğanını añlatmadı, lâkin advokatnıñ iştiraki kerekmey eken. Lâkin meni kirsetsinler dep israr ettim, öyle de olmadı», – dep haber etti Semedlâyev.

Advokat bildirgenine köre, Rolan Osmanovnıñ vaziyeti belli degil.

Osmanovnıñ ömür arqadaşı Zemine Çoyunçı (Urojaynoye) köyünde evlerinde keçirilgen tintüv vaqtında FSB hadimleri Rolannı urdı, dep tarif etti.

2019 senesi Osmanovnıñ evinde «operativ-qıdıruv tedbirleri» keçirildi. Uquq qoruyıcılar narkotik qıdırdı, amma bir şey tapmağanlar.

2022 senesi iyülniñ 13-nde «Nariman Celâl davasınıñ» esnası keçirilgen Rusiye Qırım Yuqarı mahkemesiniñ binası ögünde 39 yaşında Rolan Osmanovğa vatandaş urbasında, maskalı insanlar kelip tuttı. Daa soñra alınğan malümatqa köre, onı advokatlarnı tutuv ile alâqası olğan «E» merkeziniñ yolbaşçısı Ruslan Şambazov tuttı. Onıñ qararında Osmanov Facebook saifesinde «Rusiye Federatsiyasınıñ silâlı quvetlerini itibardan tüşürgen» paylaşuvlar yaptı, dep aytıla. «E» bölügine barmaq talabını red etti, er şeyni cep telefonına çıqardı, «itti» ve «tirendi». Onıñ areketleri Rusiye Federatsiyası Memuriy uquq bozuvları kodeksiniñ 19.3 maddesiniñ 1-nci qısmına istinaden memuriy protokol temeli oldı.

Sentâbr ayında Rusiye kontrolindeki Aqmescitniñ Kiyev rayon mahkemesi jurnalistke «Rusiye ordusını itibardan tüşürgeni içün» 40 biñ ruble para cezasını berdi.

Rolan Osmanov – qırımlı faal, vatandaş jurnalisti ve strimer. O, «restavratsiya» manaçığınen Han sarayınıñ yoq etilüvine qarşı narazılıq bildirgen edi.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG