Bütün ürmetli jurnalist toplulığına menim samimiy selâmlarım! Tecavuzcınıñ apishanesine qapatıluv, tuvğan Qırımdan sürgün etilüv ve RF akimiyetiniñ yalanlarınıñ üstüni açqan meni ve diger qırımtatarlarnı, faallerni, vatandaş jurnalistlerini etraf müitten ayıruv ıntıluvlarına baqmadan, Rusiye akimiyetiniñ ve Qırımdaki işğalci başlıqlarnıñ memnüniyetsizligi altına oğranlarnıñ sıraları epimiz içün qıymetli olğan adamlar ve zenaatdaşlar, şu cümleden ihtisasiy jurnalistler ile tolğanını eşitemiz. Olar yarımadamızda açıq kök astında balaban bir apishanege tüşken Qırımnıñ, qırımtatar halqınıñ, Ukrayina vatandaşlarınıñ kerçek vaziyetini aydınlatalar.
Sizni samimiy, merametli, telükeniñ kenarında çalışap olğan jurnalistler kibi hatırlaymız. Siz defalarca tintüvler, yaqalavlar yerlerinde, Qırım MTİ binalarında oldıñız. Diger qırımtatar faalleri ile beraber Kremlniñ bir çoq siyasiy mabüs ailelerinde oldıñız, babasız qalğan balalar er biriñizni pek yahşı tanıylar.
Bütün bular sizni toqtatmay ve öz işiñizni, yani dünyağa tecavuzcınıñ gizlemege tırışqan propagandasınıñ akis tarafını namusnen köstermege keder etmey.
RF propagandacıları yalanğa millionlar masraf eteler, biz ise sadece aqiqatnı aytmalımız
Çoquñız artıq Qırımğa barıp olamay, amma faaliyetiñizde siziñ saylağan yolnıñ doğru olğanını bu pek yahşı köstere. RF propagandacıları yalanğa millionlar masraf eteler, biz ise sadece aqiqatnı aytmalımız. Qalğanını siyasetçiler yapmalı. Bunı Taras İbragimov, Anton Naumlük, Alöna Savçuk, Nikolay Semena, Gülsum Halilova, Alina Smutko, Aleksandra Yefimenko ve diger bir çoq meslekdeşim pek yahşı bile. Şimdi er biriñizniñ adını atmağanımnı bağışlañız. Amma şimdi menim tarafımdan qayd etilgenler bütün bularnı öz başından keçirdiler. Belki de er biriniñ soyadı yoq, amma men mecburen Qırımdan ketken er bir jurnalistke muracaat etem.
Zenaatdaşlarım! Bu dımlı, qaranlıq odalarda oturıp, mındaki lezetsiz şorbalarnı aşap, SİZO müdiriyeti, konvoy, mahkemeciler, prokurorlar tarafından insaniyetsiz davranuvğa sabr ile dayanıp, biz tebessüm, samimet ile dostluğımıznı ve leyhalarımıznı hatırlaymız.
Muvaqqat tutuv izolâtorlarından çıqqanlarnı qarşılağanımız, bayramlarnı qayd etkenimiz aqlımda. İmkân olsa, aqsızlıqqa, yalan qabaatlavlarğa qarşı bu zorbalıqsız, tınç küreş yolunı memnüniyet ile tekrarlarım.
Siz de iç bir şeyge peyşman olmağanıñızğa ve Qırımnı, qırımtatarlarnı ve faallerni öz ayatıñıznıñ parlaq daqqaları kibi aqlıñızda tutucağıñızğa inanamız.
Bundan ğayrı, Ukrayina TİN, EN Ukraine, ZMINA teşekkür etmege ve bunıñ ne qadar müim olğanına diqqat çekmege isteyim.
Ebediylik kibi is etilgen bu sekiz yıl içinde biz bayağı şey başımızdan keçirdik, amma bizim yolumız daa soñuna kelmedi. Ruhtan tüşmemek, ğayret etmek ve ep ileri ketmek ğayet müimdir.
Bu kibi yasaqlar, sıñırlavlar yolumız doğru olğanına isbatlay.
Birisini tevqif etseler, ketmege mecbur etseler bile, onıñ yerine başqası kele
Bizim birdemligimiz Rusiyeniñ imza atqan halqara añlaşmalarnı (qanunlarnı) körmemezlikke urmağa ve esas maqsadına (er kesni sustırmağa) irişmege bermey. Birisini tevqif etseler, ketmege mecbur etseler bile, onıñ yerine başqası kele.
Toqtamaycağımızğa eminim. İstegen yolnı tapar, istemegen sebepler qıdırır. Er birimiz öz misalinde divarlar, apishaneler, yasaqlar küreşni devam ettirmek içün mania olmamağanını köstere.
"Birlikte quvet!" bu "Qırım birdemliginiñ" şiarıdır.
Serbest Qırımda körüşkence!
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Server Mustafayev, Ukrayina vatandaşı, jurnalist, Kreml siyasiy mabüsi
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.