RF FSB-sı qırımlı Leniye Umerovanı Rusiye İç işler nazirliginiñ Vladikavkazdaki muvaqqat tutuv izolâtorından bellisiz yerge alıp ketkenler. Bunı "Qırım uquq qoruyıcı gruppası" Leniyeniñ ağası Aziz Umerovğa atfı etip bildire.
"Bugün ana-babam onı izolâtorda yoqlaycaq oldı, amma olarnı yibermediler, çünki Leniye anda artıq yoq eken. Onı şeylerinen FSB hadimleri alıp ketkenleri belli oldı. An-babamnıñ ona qayda, ne sebepten, ne içün alıp kettiler kibi suallerine böyle cevap berdiler: "Bu FSB, yuqarı organ, olarğa bizge cevap bermeyler", - UQG Umerovnıñ aytqanlarından alıntı ketire.
Onıñ sözlerine köre, olar Leniyeniñ bulunğan yeri aqqında bilmeyler.
"FSB hadimleri onıñ arqasından kelecegine şübelenmedik, çünki bütün bu beş ay içinde olar oña qarşı cinayet davanı sahteleştirdiler, amma bir dane resmiy qabaat kösterip olamadılar. Bunıñ yerine onı bir şey añlatmayım alıp kettiler. Terrorcı memleket öz kirli oyunını ve tınç ealinige qarşı terrornı devam ete. Leniye ve diger siyasiy mabüslerge qarşı qanunsız aktsiyalarda iştirak etken er kes mesüliyetke çekilecek" - dep qoştı o.
Mayısnıñ 1-nde yarım yıldan berli Rusiyede tutulğan 25 yaşında qırımlı Leniye Umerovanıñ vesiqalarını Şimaliy Osetiya-Alaniya Cumhuriyetiniñ FSB-sı tutıp alğanı belli oldı.
Bıltır dekar ayında 25 yaşında Leniye Umerova Kyivden Qırımğa ketmege mecbur edi, çünki babasınıñ qanseri bar. Rusiye sıñırcıları Leniye Umerovanı Gürcistan-Rusiye sıñırından keçken soñ rejim alanı qaidelerini bozğanı sebebinden tuttı.
Ağası Aziz Umerov Qırım.Aqiqatqa izaat berip, qardaşı üç ay devamında çetele vatandaşları içün merkezde tutuldı, der tarif etti. Amma martnıñ 13-nde mahkeme qararınen onı andan azat etip aldılar.
«Advokatlarğa, tuvğanlarına telefon etmege imkân bermediler – gece yarısı onı o merkezden çıqardılar. Bundan soñ vatandaş urbada erkeklernen maşina keldi, başına çuval taqqanlar, belli olmağan yerge alıp ketkenler ve soqaqqa atqanlar», – dep tarif etti Umerov.
Aman-aman birden Leniyeni vesiqaları olmağanı içün polis patruli tuttı, dep tarif etti ağası. Rusiye mahkemesi ise onı 15 künge apiske aldı. Soñra qızğa qarşı daa eki protokol tizildi – ana-babasına telefon etmek içün qullanğan telefonını vaqtında bermegeni ve konvoy maşinasından çıqmağa razı olmağanı içün. Eki sefer de mahkeme Ukrayina vatandaşınıñ apis müddetini 15 künge uzattırdı.
Qırım Muhtar Cumhuriyeti ve Aqyar prokuraturası Rusiye tarafından qırımtatarı Leniye Umerovanıñ tutulğanını tahqiq etip olamay, çünki bu cinayet Qırımda olmağan.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
